Reseı avtoóndirýshileri Qazaqstan naryǵyndaǵy pozıtsııasyn joǵalta bastady
ALMATY. QazAqparat - Maýsym aıynda Reseıden keletin avtokólikterdiń sany 5,3 %-ǵa azaıdy. Al, otandyq óndirýshilerdiń satý úlesi jalpy naryqtyń 27,3%-yn qurap, burynǵy kórsetkishti saqtap qaldy.
Mundaı derekti Qazaqstan avtobıznes qaýymdastyǵy keltirdi.
Resmı naryqta Reseı kólikteriniń eń joǵary satylymy 2015 jyldyń aqpan aıynda tirkelgen. Bul aıda 7076 avtokólik satylǵan. Al maýsymda bul kórsetkish 20%-ǵa azaıdy.
Ásirese, Reseıde shyǵarylǵan Lada, Hyundai, Kia, Uaz markalarynyń satylymy quldılap ketken.
Sarapshylardyń aıtýynsha, bul otandyq kólikterge degen suranystyń artyp jatqandyǵyn kórsetedi.
Satylymnyń ósýine negizinen jeńildikpen nesıe berý baǵdarlamasy septigin tıgizgen.
Qazaqstan damý banki osy ýaqytqa deıin 3521 ótinimdi qabyldap, 11 mlrd teńge bóldi. Baǵdarlama qarjysynyń 73,7%-y ıgerildi.
Mundaı qoldaý otandyq ónimniń satylymyn eki esege deıin arttyrǵan.
Mamandardyń aıtýynsha, kúzge taman jeńildikpen avtonesıe baǵdarlamasyna suranys arta túspek.
