Reseı, Avstralııa jáne Jańa Zelandııa álemdik jalpy ónimniń 60 paıyzynan artyǵyn óndiretin ASEM uıymyna qosyldy
BRıÝSSELЬ. Qazannyń 6-sy. QazAqparat /Dımash Syzdyqov/ - Brıýsselde ótken ASEM («Azııa-Eýropa» forýmy) sammıti barysynda Reseı, Avstralııa jáne Jańa Zelandııa uıymǵa múshe elderi álemdik jalpy ónimniń 60 paıyzynan artyǵyn óndirip, álemdik saýdanyń úshten ekisin qamtamasyz etip otyrǵan atalmysh uıymǵa resmı túrde qosyldy. Bul týraly forým qorytyndylary boıynsha jýrnalısterge Eýropalyq keńestiń prezıdenti Herman Van Rompeı málim etti.
Onyń sózine qaraǵanda, bul elderdiń qosylýy olardyń ekonomıkalyq tartymdylyǵyn rastaıdy.
«Jahandyq ekonomıkalyq máselelerdi talqylaý barysynda biz turaqsyz qalpynda qalyp otyrǵan ekonomıkalyq jaǵdaıdy retteý boıynsha ujymdyq kúsh-jigerdi paıdalanýdyń qajettiligin maquldadyq. Biz ınvestıtsııalarymyzdy adam kapıtaly men jańa tehnologııalardyń damýyna salý kerekpiz jáne de áleýmettik qorǵaýdy damytyp, ony halyqtyń qajettiligine beıimdeý kerekpiz. Sonymen qatar, biz kúsh-jigerimizdi Halyqaralyq valıýta qory men qarjylyq retteýdi reformalaýǵa da jumsaǵanymyz jón bolady», - dep atap ótti Eýropalyq keńestiń prezıdenti.
Kezdesý qorytyndylary boıynsha, Brıýsseldegi «Azııa-Eýropa» segizinshi sammıtiniń qatysýshylary tıimdi ekonomıkalyq basqarý joldaryn izdeýge kelisip, arnaıy deklaratsııaǵa qol qoıdy.
