Reseı Aýyl sharýashylyǵy mınıstrligi Qazaqstannan et jetkizýge baılanysty arnaıy baǵdarlama ázirledi - Ó. Shókeev
ASTANA. 19 qańtar. QazAqparat /Rýslan Ǵabbasov/ - Reseı memleketi Qazaqstannan tasymaldanatyn etterdi ózderine ótkizýge baılanysty arnaıy baǵdarlama ázirledi.
Bul týraly búgin Úkimette iri qara etiniń eksporttyq áleýetin damytýǵa negizdelip ázirlengen jobaǵa baılanysty keńeste Premer-Mınıstrdiń birinshi orynbasary Ómirzaq Shókeev málim etti.
«Keden odaǵy 2010 jyldyń qyrkúıeginen bastap jumys isteýde. Osy oraıda biz úshin jańa múmkindikter ashylyp otyr. Reseı 1 mln. 700 myń tonna iri qara etin ımporttaıdy. Onyń negizgi bóligi Ońtústik Amerıka elderinen jetkiziledi. Atap aıtqanda, elimiz úshin bul naryqta oryn alý múmkindigi ashylyp otyr,-dedi vıtse-premer.
Onyń sózine qaraǵanda, Reseı tarapy mal etin Qazaqstannan, Belarýstan jáne kórshiles elderden jetkizilgenin qalap otyr. «Qazaqstan men Reseıdiń aýyl sharýashylyǵy mınıstrlikteri osy máselege baılanysty arnaıy alqa májilisin ótkizdi. Reseı Aýyl sharýashylyǵy mınıstrligi Qazaqstannan et jetkizýge baılanysty arnaıy baǵdarlamany ázirledi. Endi ol etti jetkizýdi qamtamasyz etýimiz shart»,-dedi Ó. Shókeev.
Úkimet basshysynyń birinshi orynbasary ekonomıkalyq turǵydan alyp qaraǵanda, asyl tuqymdy mal basyn asyraý tıimdi ekenin aıta kele: «Atap aıtqanda, tiri salmaqta asyl tuqymdy iri qara 500 kg deıin jetedi. Al, asyl tuqymdy emes maldar 300 kg shamasynda salmaq jınaıdy»,-dedi.
Sonymen qatar Ó. Shókeev qazaqtyń aqbas tuqymdy sıyryn ósirý máselesine toqtala kele: «Búginde elimizde ózimizdiń asyl tuqymdy aqbas tuqymdy sıyr máselesi tóńireginde kóp aıtylyp júr. Búginde olardyń sany óte az qaldy. Eger qazaqtyń asyl tuqymdy iri qarasyna ǵana negizdeletin bolsaq, biz bul tuqymdy ósirýge 30 jyl ýaqyt jumsaıtyn bolamyz. Al 30 jylda bizdi syrtqy naryqta kim kútip otyrady»,-dedi.
