Reseı aýmaǵyndaǵy Ertis ózeninde jolaýshylar teplohody apatqa ushyrap, bir qazaqstandyq mert boldy - QR SІM
ASTANA. 19 tamyz. QazAqparat - Omby qalasynda Ertis ózeninde jolaýshylar teplohody júk barjasymen qaqtyǵysyp, 3 qazaqstandyq zardap shekti. Olardyń 1-eýi qaza tapty.
Bul týraly búgin QR SІM baspasóz hatshysy Nurjan Aıtmahanov málimdedi.
«2013 jyldyń 17 tamyzy kúni Omby qalasynda Ertis ózeninde «Polese-8» jolaýshylar teplohody júk barjasymen soǵysyp qalǵan bolatyn. Soǵysý saldarynan 40-tan astam adam ár túrli deńgeıde jaraqat alǵan. Sonyń ishinde 3 Qazaqstan azamaty bar. QR azamatshasy, 1955 jyly týylǵan Emma Postnıkova alǵan jaraqaty saldarynan sol kúni, ıaǵnı 17 tamyzda Omby qalasynyń 4-shi medıtsına-sanıtarlyq bólimshesinde kóz jumdy», - dep habarlady ol.
Baspasóz hatshysynyń málimetinshe, E. Postnıkovanyń uly 1977 jylǵy Denıs Postnıkov qazirgi ýaqytta Omby qalasynyń №1 jedel medıtsınalyq járdem aýrýhanasynyń neırohırýrgııalyq bóliminde jatyr. Onyń jaǵdaıyn dárigerler ortasha-aýyr dep baǵalaǵan. Al taǵy bir qazaqstandyq azamatsha, 1971 jyly týylǵan Olga Pershına aýyr halde Omby qalalyq aýrýhanasynda jatyr.
«QR Omby qalasynda ornalasqan konsýldyq qyzmet Omby ákimshiligimen jáne basqa da quzyretti organdarmen tıisti baılanystar ornatty jáne qaza tapqan, jaraqat alǵan qazaqstandyqtardyń týystarymen tıisti baılanys ornatyldy», - dep atap ótti ol.
«Omby qalasyndaǵy bizdiń konsýldyqtan kelip túsken aqparattarǵa sáıkes, búkil shyǵyndar, onyń ishinde máıitti Qazaqstanǵa jetkizý jáne basqa da medıtsınalyq kómek kórsetýge qajetti tólemaqylardyń barlyǵyn Omby qalasynyń ákimshiligi, ıaǵnı Reseı tarapy óz moınyna alady», - dedi N. Aıtmahanov.
