Reseı áýejaılarynda qalyp qoıǵan qazaqstandyqtar qashan elge orala alady
MÁSKEÝ. QazAqparat – Reseı Federatsııasyndaǵy QR Elshiligi Máskeý, Omby jáne Ekaterınbýrg áýejaılarynan elge usha almaı qalǵan qazaqstandyqtardyń tranzıt máselesin túsindirdi, dep habarlaıdy QazAqparat.
«RF Úkimetiniń shet elderdiń jáne osy eldiń azamattyǵy joq azamattardy elge kirgizýge shekteý qoıý týraly qaýly shyǵarýyna baılanysty basqa memleketterden Otanyna tranzıt arqyly kele jatqan qazaqstandyqtar Reseı áýejaılarynda qalyp qoıdy. RF-daǵy Qazaqstan elshiliginiń qyzmetkerleri COVID-19 koronavırýsynyń taralýyna qarsy jedel áreket etý sharasy aıasynda QR SІM-men kúsh biriktire otyryp táýlik boıy otandastarymyzben baılanysta otyr» delingen habarlamada.
Elshilik málimetine saı, Vnýkovo áýejaıynda Qazaqstannyń 15 azamaty bar. Onyń 11-i Domınıkan respýblıkasynan tranzıtpen kele jatqan. Sondaı-aq, Germanııa, Shrı-Lanka, Nıachanga (Vetnam) jáne Goadan (Indııa) kele jatqan 4 jolaýshy bar.
Olar Máskeýge Azur Air áýekompanııasynyń ushaǵymen kelgen. Bul kompanııanyń ókili Dmıtrıı Shabanovtyń aıtýynsha, jolaýshylarǵa kelgeli beri ystyq tamaq berilip keledi.
Odan bólek, Ombyda 26 qazaqstandyq jolaýshy (Nur-Sultan, Pavlodar jáne Petropavl qalalarynyń turǵyndary) áýe reısteriniń toqtatylýyna baılanysty qalyp qoıyp otyr.
19 naýryz kúni jergilikti ýaqytpen 20:00-de Ekaterınbýrgtegi «Koltsovo» áýejaıyna Phýketten (Taıland) Azur Air áýekompanııasynyń ushaǵy kelip qondy. Osy ushaqpen 11 jerlesimiz kelgen bolatyn. Qazandaǵy QR Bas konsýldyǵy olarmen udaıy baılanysta otyr.
20 naýryz kúni barlyq Qazaqstan azamattary jergilikti ýaqyt boıynsha 16:25-te Air Astana reısimen Nur-Sultan qalasyna ushyp shyǵady. Qazirgi sátte olar áýejaıdyń tranzıttik aýmaǵynda oqshaýlanǵan qonaqúılerde ornalasqan.
