Reseı áýe kompanııalarynyń shyǵyny 20 mlrd rýblge jetýi múmkin

MÁSKEÝ. KAZINFORM — Reseı áýejaılary ushqyshsyz ushý apparattarynyń shabýyldaryna baılanysty engizilgen qaýipsizdik sharalary men qolaısyz aýa raıyna baılanysty týyndaǵan iri kólik daǵdarysynan keıin birtindep qalypty jumys tártibine oralyp jatyr, dep habarlaıdy Kazinform agenttiginiń tilshisi.

Reseı Kólik mınıstrliginiń málimetinshe, 5 shildede Sheremetevo, Pýlkovo jáne Strıgıno (Tómengi Novgorod) áýejaılarynda 250-den astam reıs toqtatylyp, 270-ten astamy keshiktirilgen. 6 shilde kúni saǵat 18:00–degi jaǵdaı boıynsha, Sheremetevoda — 171, Pýlkovoda — 90, Strıgınoda — 26 reıs toqtatylyp, tıisinshe 56, 37 jáne 13 reıs eki saǵattan artyq keshikken.

Jalpy eseppen 480 reıs toqtatylyp, keshiktirilgen. Bul shara búkil el boıynsha júzdegen myń jolaýshyǵa áser etti.

Avıaqyzmet ókilderiniń málimetinshe, 88 ushaq basqa áýejaılarǵa baǵyttalǵan, 43 myń reıs boıynsha bıletter qaıtarylǵan, al 94 myń jolaýshy ýaqytsha qonaq úılerge ornalastyrylǵan. Jolaýshylarǵa 199 myń sýsyn talony men 155 myń azyq-túlik talony taratylǵan.

Qazirgi ýaqytta barlyq reseılik áýejaı qalypty jumysyn jalǵastyryp jatyr. Kólik mınıstrligi bul shekteý sharalary tek azamattyq áýe reısteriniń qaýipsizdigin qamtamasyz etý úshin engizilgenin jáne ol qaýiptiń aldyn alýǵa baǵyttalǵan májbúrli sheshim ekenin málimdedi.

Jalpy alǵanda, sarapshylardyń esebi boıynsha, bul jaǵdaıdan Reseıdiń áýe kompanııalaryna keltiretin shyǵyn 20 mıllıard rýblden (shamamen 132 mıllıard teńgeden) asýy múmkin. Buǵan bılet aqshasyn qaıtarý, jolaýshylarǵa ótemaqy tóleý, ekıpajdardy ornalastyrý jáne ushaqtardy tehnıkalyq qamtamasyz etý shyǵyndary kiredi.

Kólik salasyndaǵy bul jaǵdaı 5 shildedegi dron shabýyldarymen baılanysty. Olar Reseıdiń 15 aımaǵynda, sonyń ishinde iri kólik toraptarynyń mańynda, tirkelgen.

Osy jaǵdaıǵa baılanysty turǵyndar temirjol bıletterin satyp ala bastaǵan. Bul rette «Reseı temir joldary» kompanııasy qosymsha poıyzdar shyǵardy.

Osy ahýal aıasynda búgin Reseı Prezıdenti RF Kólik mınıstri Roman Starovoıtty qyzmetinen bosatty. Ol bul laýazymǵa byltyr mamyrda taǵaıyndalǵan.

Buǵan deıin Izmır áýejaıy jumysyn ýaqytsha toqtatqany týraly  habarlaǵanbyz.