Reseı astanasynyń ortalyǵyndaǵy Wildberries keńsesiniń janynda atys bolyp, eki adam qaza tapty

ASTANA. KAZINFORM - Máskeý ortalyǵyndaǵy Wildberries keńsesiniń janynda atys bolyp, birneshe adam ustaldy. Bul týraly reseılik TASS agenttigine quqyq qorǵaý organynyń ókilderi habarlaǵan.

«Qazirgi tańda birneshe adam ustalyp, olardyń barlyǵy Arbat aýdandyq ishki ister mılıtsııasy bólimine jetkizildi»,-dedi agenttikke habar taratqan adam.

Wildberries-tiń negizin qalaýshy Tatıana Bkalchýktyń sózinshe, bul - Vladıslav Bakalchýk, Sergeı Anýfrıev jáne Vladımır Bakınniń jetekshiligimen uıymdastyrylǵan sátsiz reıderlik basyp alý áreketi.

Tatıana Bakalchýk óziniń úndeýinde quqyq qorǵaý organy qyzmetkerlerinen jaǵdaıdy baqylaýǵa alýdy suraǵan.

TASS agenttiginiń habarlaýynsha, Wildberries-tiń Reseı astanasy Máskeý ortalyǵyndaǵy keńsesiniń aldynda atys bolǵan. Aldyn ala málimet boıynsha 2 adam mert bolyp, taǵy jeteýi jaraqat alǵan.

Buǵan deıin Wildberries jáne Russ birlesken kompanııasynyń baspasóz qyzmeti onlaın reteılerdiń seriktesi Vladıslav Bakalchýktiń kúzetshilerimen birge keńsege basa kóktep kirmek bolǵany habarlandy.

Aıta keteıik, maýsym aıynyń ortasyna taman Wildberries marketpleısi men syrtqy jarnama operatory Russ kompanııasy jańa tsıfrlyq saýda platformasyn qurý úshin birigetin bolyp sheshken. Vladıslav Bakalchýk buǵan qarsy bolǵan. Ol «Vaıldberıs» ashyq aktsıonerlik qoǵamy aktsııalarynyń 1% ıe. Qalǵan 99% kompanııanyń negizin qalaýshy, onyń áıeli Tatıana Bakalchýktyń ıeliginde edi.

Wildberries pen Russ-tyń baspasóz qyzmeti birlesken kompanııanyń osy oqıǵalar kezinde de turaqty jumys istep jatqanyn jáne ózderiniń mindetterin tolyq atqaratynyn habarlaǵan.

Tatıana Bakalchýk 30 shilde kúni Vladıslav Bakalchýkpen ajyrasý týraly sotqa aryz bergen.