Reseı astanasyndaǵy qoǵamdyq kólikte bıometrııa arqyly tólem jasaý keńeıtilip jatyr
MÁSKEÝ.KAZINFORM — Reseı astanasynda Máskeý ortalyq dıametrlerinde jolaqyny bet-álpetti taný arqyly tóleý qyzmetiniń qoldanylý aımaǵy keńeıip jatyr. Bıyl jazdan bastap mundaı tólem tásili Máskeý ortalyq dıametrlerindegi úsh jelisindegi týrnıkette qoljetimdi bolady, dep habarlaıdy agenttik tilshisi Máskeý ákimshiligine silteme jasap.
Habarlamada aıtylǵandaı, bul jazda bet-álpetti taný arqyly tólem jasaý birinshi, ekinshi jáne tórtinshi Máskeý ortalyq dıametrleri jelilerinde iske qosylady. Tehnologııa 74 stantsııadaǵy 326 ótkelde engiziledi. Al 2026 jyldyń sońyna deıin bıometrııa arqyly tólem MOD-3 jelisinde jáne jerústi kóliginde de paıda bolady.
— Máskeý — bıometrııa arqyly tólem jasaý qoljetimdi kólik túrleriniń sany boıynsha álemdik kóshbasshy. Eń yńǵaıly tólem servısi metronyń barlyq stantsııasyndaǵy barlyq týrnıkette, Máskeý ortalyq aınalma jolyndy, aeroekspresste, turaqty ózen baǵyttarynda jáne Máskeý ortalyq dıametrleriniń keıbir stantsııalarynda jumys isteıdi. Qazirdiń ózinde júıede shamamen 800 myń paıdalanýshy tirkelgen. 2021 jyly iske qosylǵan sátten bastap jolaýshylar bet-álpetti taný arqyly 200 mıllıonnan astam ret ótken, — dedi Máskeý meriniń kólik jáne ónerkásip máseleleri jónindegi orynbasary Maksım Lıksýtov.
Dıametrlerde júıe basqa kólik túrlerindegideı jumys isteıdi: jolaqy tóleý úshin týrnıkettegi kameraǵa qaraý jetkilikti. Qyzmetke «Metro Moskvy» qosymshasy arqyly qosylýǵa bolady. Ol úshin jeke kabınette óz sýretińizdi júktep, bank kartasyn tirkeý jetkilikti.
Sondaı-aq, neırojeli paıdalanýshynyń fotosyn derbes derektersiz sımvoldar jıyntyǵyna aınaldyratyny atap ótiledi. Ony qaıtadan sýretke aınaldyrý nemese naqty paıdalanýshymen baılanystyrý múmkin emes. Týrnıketten ótken sátte júıe adamdy foto nemese vıdeodan ajyrata alady: jolaýshynyń mımıkasy men qozǵalysyn taldaıdy. Tehnologııa bank deńgeıindegi qorǵaýǵa ıe, barlyq server Reseıde ornalasqan, al derekter senimdi túrde shıfrlanǵan.
Buǵan deıin Astanada ornatylatyn jańa beınebaqylaý kameralary azamattardyń bet-álpetin jáne minez-qulqyn tanıtyny týraly habarlanǵan edi.
