Reseı ártisi Nına Ýsatova: Qatıra bolý - taǵdyrymnyń syıy
ALMATY. QazAqparat - Almaty oblysynda Ermek Tursynovtyń «Kınomehanık» fılminiń túsirilim jumystary bastalyp ketti, dep habarlaıdy QazAqparat tilshisi.
Kınoǵa Reseı ártisi Nına Ýsatova túsýde. «Holodnoe leto pıatdesıat tretego», «Mýsýlmanın», «Barak» fılmderinde túsken belgili aktrısa shopannyń jesirin somdaıdy.
«Men úshin bul ról - balalyq shaǵyma saıahat ispettes. Men Altaıda týǵanmyn. Jylqy, saıyn dala ıisi maǵan etene tanys. Bul róldi alǵanym kezdeısoq emes. Bul - taǵdyrdyń syıy. Qazaqstandyq áriptesterimmen jıi kezdesip turatynmyn. Ermektiń shyǵarmashylyǵyn bilemin. «Shal» kınosynda bas keıipkermen birge janym kúızeldi. Kartına shynaıy túsirilgen. Shal qasqyrlardan qashqanda men de «qash, qash» dep qosa baqyryp otyrdym. Fılmde ıýmor da, tragedııa da bar, kúletin jerinde kúldim», - dedi Nına Ýsatova.
Aıta ketý kerek, Erbolat Toǵyzaqov «Kınomehanık» fılminde oınaıdy.
Al basty róldi 69 jastaǵy akter Murat Muqajanov somdaıdy. Akter sahnaǵa 50 jyldan soń oralyp otyr.
«Barlyq balalar sııaqty men de akter bolsam eken dep armandaıtynmyn. 1965 jyly Qurmanǵazy atyndaǵy óner ınstıtýtyna tústim. KSRO halyq ártisi Hadısha Bókeevanyń klasynda Áshirbek Syǵaı, Áshiráli Kenjeev, Ersaıyn Dúısenbıev, Quman Tastanbekov bárimiz oqydyq. Eń alǵash ret túsirilim alańynda 1967 jyly Aleksandr Karpovtyń «Doroga v tysıachý verst» fılminde, sosyn Abdolla Qarsaqbaevtyń «Brat moı» kınosynda oınadym. 70-jyldary Semeıge qaıta oralyp, keıin áskerge shaqyryldym», - dedi akter.
Áskerden soń Murat Muqajanov jergilikti mektepte spektakl qoıýmen aınalysqan. Qazir aqsaqal Almatyda turady. Alty nemere súıip otyr.
«Bul rólge úmitker kóp boldy. 40-50 adam desek bolady. Osy jastaǵy akterlermen kóp sóılestik. Men Murat aǵany kópten bilemin. Ermekpen tanystyrdym. Ermek jańa esimderdi shyǵarǵandy jaqsy kóredi ǵoı. Uzaq tolǵanystan soń Murat aǵa Qaıyrjannyń róline taǵaıyndaldy», - dedi prodıýser Qanat Tórebaı.
Túsirilim jumystary Almaty oblysynda 28 maýsymǵa deıin jalǵaspaq. Montaj jumystary osy jyldyń sońyna deıin aıaqtalady dep josparlanyp otyr.
Aıta ketý kerek, «Kınomehanık» kartınasy QR Mádenıet jáne sport mınıstrliginiń tapsyrymen túsirilip jatyr.
Jas sarbaz Ekinshi dúnıejúzilik soǵys kezinde nemis qarııadan jyljymaly kınoapparat syıǵa alady. Qartaıǵan shaǵynda sarbaz aýyldardy aralap, eski fılmderdi kórsetip júredi.
