Reseı armııasy 5 delfın satyp almaqshy
ASTANA. QazAqparat - Reseıdiń Qorǵanys mınıstrligi 5 afalına - delfınin satyp almaqshy. Vedomstvo qajettiligi úshin úsh atalyq, eki urǵashy kıttárizdini satyp alýǵa ashyq baıqaý ótkizý jónindegi aqparat resmı memlekettik satyp alý saıtynda jarııalandy.
Árbir delfınge 350 myń rýbl tólenedi, jalpy somasy 1,75 mln rýbl (8,4 mln teńge shamasynda). Baıqaýdyń jeńimpazy afalınalardy Sevastopolge 1 tamyzǵa deıin jetkizip berýi tıis.
Satyp alý shartyna sáıkes delfınder júzýge belsendi, boılary 2,3 metrden kem emes ári 2,7 metrden uzyn bolmaýy tıis. Jastary da 3 jastan kishi emes, 5 jastan úlken bolmaýy kerek.
Reseı armııasyna delfınderdiń nege qajet bolǵany qujattarda naqty kórsetilmegen. Buǵan deıin áskerı mekemeniń ókili Qara teńiz flotynda teńiz janýaryn áskerı maqsatta úıretetin qurylymnyń joqtyǵyn málimdegen.
Eske sala ketsek, KSRO-da áskerı maqsatqa delfınderdi úıretý 1973 jyly bastalǵan, al AQSh armııasynda bul janýarlar sońǵy 50 jyldan beri qyzmet etip keledi. Afalına-delfınder Iraktaǵy áskerı operatsııaǵa paıdalanyldy. Olar teńizde mınalardy izdegen.
