Reseı arqyly jetkizgen: ShQO-da iri esirtki arnasy joıyldy

ÓSKEMEN. QazAqparat – Shyǵys Qazaqstan oblysynyń polıtseıleri arnaıy operatsııa júrgizip, iri esirtki arnasyn joıdy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, esirtki qylmysyna qarsy is-qımyl basqarmasynyń qyzmetkerleri arnaıy operatsııa júrgizgen.

Sonyń nátıjesinde, Reseıden Semeı jáne Óskemen qalalaryna sıntetıkalyq esirtkiniń iri partııalaryn jetkizip otyrǵan eki adam ustaldy.

Tintý kezinde 28 jáne 24 jastaǵy kúdiktilerden jalpy salmaǵy 1,5 keliden asatyn sıntetıkalyq esirtki tárkilendi. Bul - birrettik 5 myń dozaǵa teń.

Aldyn ala baǵalaý boıynsha onyń «qara naryqtaǵy» quny - shamamen 30 mln teńge.

Sonymen qatar olar jalǵa alǵan páterlerden esirtkini ólshep-oraýǵa arnalǵan zattar tabyldy.

«Belgili bolǵandaı, esirtki arnasy Reseı Federatsııasy arqyly uıymdastyrylǵan. Esirtki sol elden ártúrli logıstıkalyq kólik kompanııalary arqyly jiberilip otyrǵan. Kúdiktilerge qatysty QR QK-niń 296-baby 4-bóligine (esirtki quraldaryn, psıhotroptyq zattardy, olardyń analogtaryn asa iri mólsherde ótkizý maqsatynsyz zańsyz daıyndaý, qaıta óńdeý, satyp alý, saqtaý, tasymaldaý) sáıkes sotqa deıingi tergeý amaldary júrgizilýde. Esirtkiniń zańsyz aınalymyna qatysy bar ózge de adamdar izdestirilip jatyr», - dedi oblystyq PD bastyǵynyń orynbasary Talǵat Shaıahmetov.