Reseı arqyly ótetin Qazaqstan jolaýshylaryn jetkizý merzimi qysqartylady
ASTANA. QazAqparat - QR Parlamenti Senatynyń jalpy otyrysynda palata depýtattary «1996 jylǵy 18 qazandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy temirjol kóligi kásiporyndarynyń, mekemeleri men uıymdarynyń qyzmetin quqyqtyq retteýdiń erekshelikteri týraly kelisimge ózgerister engizý týraly hattamany ratıfıkatsııalaý týraly» zań jobasyn qabyldady, dep habarlaıdy QazAqparat.
QR Investıtsııalar jáne damý mınıstri Jeńis Qasymbektiń sózine qaraǵanda, Hattamamen taraptardyń basqarýyna berilgen temirjol ýchaskeleri boıynsha memlekettik shekara arqyly jolaýshylar jáne júk poıyzdarynyń toqtaýsyz ótý tártibi qarastyrylady.
«Sonymen qatar toqtaýsyz ótetin poıyzdar shekara qyzmeti jaǵynan bolatyn tekserýlerge jatpaıdy. Atalǵan normalar jolaýshylardy jetkizý merzimin bir baǵytta 36 saǵattan 23 saǵatqa deıin qysqartýǵa múmkindik beredi»,- dedi mınıstr zań jobasy boıynsha baıandama jasaý barysynda.
Mınıstrdiń sózine qaraǵanda, budan basqa, hattamamen ózge eldiń aýmaǵynda ornalasqan bir eldiń temirjol ýchaskesinde júk operatsııalaryn júrgizý úshin stansalardy ashý jáne jabý tártibi reglamentteledi.
«Hattamamen shekaralyq aımaqtardaǵy jolaýshylar tasymalyn uıymdastyrý máseleleri qarastyrylǵan. Sonyń ishinde jergilikti atqarýshy organdarǵa konkýrsty uıymdastyrý, tasymaldaýshylardyń shyǵynyn sýbsıdııalaý erejelerin ázirleý boıynsha quzyreti beriletin bolady»,-dedi Qasymbek.
