Reseı Amýr jolbarystaryn Qazaqstanǵa berýge daıyn

ASTANA. KAZINFORM – Amýr jolbarystaryn Reseıden Qazaqstanǵa ákelip reıntrodýktsııalaý jobasy boıynsha kelissózder júrgizilip jatyr. Reseı ádisteme ázirlep, jolbarystardy tapsyrýǵa daıyn, dep habarlaıdy Gazeta.Ru. 

Bul týraly «Amýr jolbarysy» ortalyǵynyń bas dırektory Sergeı Aramılev RIA Novostı agenttigine bergen suhbatynda aıtty.

2022 jyly Shyǵys ekonomıkalyq forýmynda Reseı men Qazaqstan jolbarystardy Qazaqstanǵa qaıtarý týraly kelisimge qol qoıdy jáne olardyń birazy Prımoreden jetkizilýi múmkin.

Reseı prezıdenti Vladımır Pýtın Qazaqstan Reseı tájirıbesiniń kómegimen 2025 jylǵa qaraı jolbarystardy Ortalyq Azııaǵa qaıtara alatynyna senim bildirdi.

Aramılevtiń aıtýynsha, birinshi kezeńde Qazaqstanda ońaltý ortalyǵynda ósken tórt jolbarysty shyǵarý josparlanýda.

«Joba qazir toqtap tur. Reseı óz mindettemelerin oryndady, ádisteme ázirledi jáne dalada erkin júrgen geni taza jolbarystar qory bar. Biz janýarlardy Qazaqstanǵa qysqa merzimde tapsyrý úshin daıyndaýǵa daıynbyz... Kelissózder shtattyq rejımde jalǵasýda», - dedi Aramılev.

Sondaı-aq ol BAQ-ta Gollandııa haıýanattar baǵynan alynǵan jolbarystardy paıdalaný múmkindigi týraly aqparat paıda bolǵanyn aıtty. Onyń pikirinshe, bul jobany júzege asyrýdy qıyndatady.

«Bul bastama júzege asyryla qoımas degen úmittemiz. Munda ekologııalyq máselelermen qatar saıası máseleler de bar, biz bıliktiń sheshimin kútemiz», - dep qosty ol.

Aramılev jobanyń basty qıyndyǵy Qazaqstandaǵy jolbarystardyń tabıǵı mekendeý ortasyn, ásirese keń jaıylymdar jaǵdaıynda qaıta qurý ekenin atap ótti. Negizgi mindet – jolbarystyń malǵa shabýylynyń aldyn alý jáne adamdarmen kezdesý múmkindigin azaıtý.