EO Izraıldi E1 eldi mekenderin salýdy toqtatýǵa shaqyrdy

ASTANA. KAZINFORM — Eýropalyq Odaqtyń syrtqy ister jáne qaýipsizdik saıasaty jónindegi joǵarǵy ókili Kaıa Kallas Izraıl bıliginiń E1 eldi mekeni qurylysyn ilgeriletý týraly sheshimi eki memleketti sheshimge odan ári nuqsan keltiretinin jáne halyqaralyq quqyqty buzý ekenin málimdedi, dep habarlaıdy DW aqparat agenttigi. 

Brıýssel eger qurylys júrgizilse, bul qadam «okkýpatsııalanǵan Shyǵys Ierýsalım men Batys jaǵalaý arasyndaǵy geografııalyq jáne aýmaqtyq baılanysty, Batys jaǵalaýdyń soltústik jáne ońtústik bólikteri arasyndaǵy baılanysty úzedi» dep sanaıdy. 

EO Izraıldi eldi mekender salýdy toqtatýǵa taǵy shaqyrdy. Bul «birjaqty sheshimder» jerdegi shıelenisken jaǵdaıdy ýshyqtyrady jáne beıbitshilikke qol jetkizýdiń kez kelgen múmkindigin odan ári buzady, dep qosty EEAS.

EO Izraıldiń eki memlekettiń qatar ómir súrýi negizindegi sheshimniń ómirsheńdigin qorǵaý sharalaryn zertteýi kerek ekenine senimdi.

Germanııanyń federaldy úkimeti de Izraıldiń Batys jaǵalaýdaǵy qurylys josparlaryn synǵa aldy, dep habarlady dpa agenttigi.

— Eldi mekenderdi salý halyqaralyq quqyq pen BUU Qaýipsizdik Keńesiniń tıisti qararlaryn buzady. Bul halyqaralyq (qylmystyq — red.) sot talap etkendeı, ekijaqty kelisimge kelýdi, sondaı-aq Iordan ózeni batys jaǵalaýyndaǵy ızraıldik okkýpatsııasyn toqtatýdy qıyndatady, — dep málimdedi GFR SІM ókili.

Reuters agenttigi eske salǵandaı, eldi mekendegi qurylys jumystarynyń bastalǵanyn buǵan deıin Izraıldiń Qarjy mınıstri, «Dinı sıonızm» ásire ońshyl partııasynyń jetekshisi Betsalel Smotrıch málimdegen bolatyn.

Áńgime Ierýsalımnen shyǵysqa qaraı 7 shaqyrym jerde ornalasqan Maale-Adýmım mańynda 3 401 jańa turǵyn úı jáne E1 jobasy aıasynda kórshi aýdanda taǵy 3 515 turǵyn úı qurylysy týraly bolyp otyr, dep atap ótti Ynet portaly.

Buǵan deıin Izraıl armııasy Gazany tolyqtaı basyp alý josparyn bekitkenin habarlaǵan bolatynbyz.