Reseı Alıaska sammıtinen keıin Tramptyń jaýap saparyn kútedi

ASTANA. KAZINFORM – Reseı 15 tamyzda Alıaskada ótken eki memleket basshylarynyń sammıtinen keıin AQSh prezıdenti Donald Tramptyń jaýap saparyn kútip otyr, dep habarlaıdy TASS aqparat agenttigi. 

Bul týraly RF SІM erekshe tapsyrmalar jónindegi elshisi Rodıon Mıroshnık málimdedi. 

– Men bir nárseni aıta alamyn: biz sımmetrııaly áreketter týraly aıtyp otyrmyz. Eger Reseı basshysy AQSh aýmaǵyna baratyn bolsa, biz Qurama Shtattar kóshbasshysynyń Reseı aýmaǵyna ózara saparyn kútemiz, - dedi Mıroshnık. 

Onyń aıtýynsha, bul Reseı men AQSh arasyndaǵy qarym-qatynastardyń ary qaraı arta túsýin ańǵartady. Bul rette qısyndy jáne eki iri geosaıası derjava arasyndaǵy qarym-qatynas Ýkraınamen ǵana shektelmeıdi.

Mıroshnıktiń atap ótýinshe, AQSh pen Reseı arasynda halyqaralyq, jahandyq sıpattaǵy, tikeleı ekonomıkalyq, mádenı, sporttyq jáne basqa da qarym-qatynastar sııaqty aýqymdy máseleler bar, olardyń kópshiligi toqtap qaldy jáne eki jaqtyń da múddeleri úshin damýy kerek. 

Buǵan deıin Reseı delegatsııasy Alıaskaǵa kelgenin jazǵan bolatynbyz. 

Buǵan deıin AQSh prezıdenti Donald Tramp Reseı kóshbasshysy Vladımır Pýtınmen bolatyn kezdesýiniń sátti ótetinine 75 paıyzǵa senimdi ekenin málimdedi.