Reseı: Alty balasymen birge kúıeýiniń qolynan ajal qushqan kelinshektiń kózi tirisinde shaǵymyna qulaq aspaǵan taǵy bir polıtseı ustaldy
ASTANA. QazAqparat - Reseıdiń Tómengi Novgorod qalasynda alty balany óltirý qylmysy boıynsha polıtsııanyń taǵy bir qyzmetkeri ustaldy.
Ol - Nıjegorodskıı aýdany boıynsha №5 polıtsııa bóliminiń ýchaskelik ınspektory Vladımır Fılımonov. Reseı aqparattyq agenttikteriniń habarlaýynsha, ótken beısenbi kúni Fılımonov Tergeý komıtetine kýáger retinde kelgen soń ustaldy. Budan bir kún buryn isti tergeý aıasynda bir polıtsııa qyzmetkeriniń ustalǵany týraly habarlanǵan. Tergeý málimetterinshe, óltirilgen áıel alty balanyń anasy - ıÝlııa Belova quqyq qorǵaý organdaryna jubaıynyń ózin uryp-soqqany jáne ómirine qaýip tóndirip otyrǵany týraly talaı ret shaǵymdanyp kelgen. Tergeý jumysy kezinde №5 polıtsııa bóliminiń bes qyzmetkeri jumystan bosatylǵan.
4 tamyzda Tómengi Novgorodtaǵy páterlerdiń birinen alty bala men olardyń júkti anasynyń bólshektelgen deneleri anyqtaldy. Tergeý nusqasy boıynsha, qylmysty qazirgi kezde qamaýǵa alynǵan onyń kúıeýi Oleg Belov jasaǵan.
