Reseı, AQSh jáne Ýkraına kelissózderine Eýropa elderi de qatysýy múmkin

ASTANA. KAZINFORM — AQSh Ýkraınadaǵy qaqtyǵysty retteý jónindegi úshjaqty kelissózderge Eýropa elderiniń de qatysýyna múmkindik berip otyr. Bul týraly AQSh prezıdenti Donald Tramptyń kúıeý balasy Djared Kýshner málimdedi. Bul jóninde Kazinform agenttigi TASS-qa silteme jasap habarlady.

Djared Kýshner
Foto: Krıstına Kormılıtsyna/ POOL/ TASS

Kýshnerdiń aıtýynsha, taraptar 10–11 qarashada Abý-Dabıde ótetin Reseı, AQSh jáne Ýkraına arasyndaǵy kelissózderge belsendi daıyndalyp jatyr.

—Eýropalyq seriktesterimizben kelissózderden tys ýaqytta da tyǵyz baılanysta bolamyz. Eger kelissózderde oń nátıjege qol jetkizsek, Eýropa elderiniń tikeleı qatysýymen keńeıtilgen formatqa kóshýge kúsh salamyz, — dep jazdy ol X áleýmettik jelisinde.

Kýshner kelissózder formatyna qatysty usynystar áli de pysyqtalyp jatqanyn aıtty. Onyń pikirinshe, kelissóz protsesin durys uıymdastyrý soǵys qımyldaryn toqtatyp, turaqty beıbitshilikke qol jetkizýde sheshýshi ról atqarady.

Buǵan deıin Reuters agenttigi Abý-Dabıdegi kelissózderge AQSh atynan Djared Kýshner men prezıdenttiń arnaıy ókili Stıv Ýıtkoff qatysady dep habarlaǵan edi.

Al Reseı prezıdentiniń baspasóz hatshysy Dmıtrıı Peskov aldaǵy kezdesýde Reseı men Ýkraına arasyndaǵy ózara qaýipsizdik kepildikteri talqylanatynyn málimdedi. Reseı delegatsııasyn prezıdent kómekshisi Vladımır Medınskıı basqarady.

Buǵan deıin Peskov aldaǵy kelissózderge Eýropa ókilderiniń qatysý múmkindigin joqqa shyǵarǵan edi. Sebebi bastapqyda úshjaqty format kelisilgen.