Reseı, AQSh jáne Ýkraına arasyndaǵy kelissózdiń jańa kezeńi qarashada ótýi múmkin
ASTANA. KAZINFORM — Reseı prezıdenti Vladımır Pýtın qarasha aıynyń birinshi jartysynda AQSh pen Ýkraına qatysatyn úshjaqty kelissózderdi qaıta bastaýǵa daıyn ekenin málimdedi, dep habarlaıdy TASS.
Bul týraly Reseı basshysynyń kómekshisi ıÝrıı Ýshakov Sankt-Peterbýrgte Pýtınniń AQSh prezıdentiniń arnaıy ókili Stıv Ýıtkoffpen kezdesýiniń qorytyndysy boıynsha habarlady.
Kezdesý úsh saǵatqa jýyq ýaqytqa sozyldy. Ýshakovtyń aıtýynsha, negizgi taqyryp Ýkraınadaǵy qaqtyǵysty retteý máselesi boldy.
— Pýtın Stıv Ýıtkoffqa Reseıdiń qarasha aıynyń alǵashqy onkúndiginde negizgi másele boıynsha úshjaqty kelissózderdi qaıta bastaýǵa daıyn ekenin habarlady. Bul másele Reseı men Ýkraına úshin qaýipsizdik júıesin qalyptastyrýǵa qatysty, — dedi Ýshakov.
Onyń sózinshe, taraptar Reseı, AQSh jáne Ýkraına ókilderiniń qatysýymen kelissózderdi qaıta bastaýdyń yqtımal formatyn talqylaǵan.
Sonymen qatar Ýıtkoff Reseı prezıdentine Osloda Ýkraına prezıdenti Vladımır Zelenskıımen, Eýropa elderiniń, NATO men Eýropalyq komıssııanyń ókilderimen ótken kelissózderdiń qorytyndylary týraly aqparat bergen.
Ýshakovtyń aıtýynsha, taraptar turaqty beıbitshilikke qol jetkizý joldary jóninde de pikir almasty.
Kelissózderge beınebaılanys arqyly Djared Kýshner de qatysty. Densaýlyǵyna baılanysty ol Sankt-Peterbýrgke kele almady.
Reseı prezıdentiniń kómekshisi kezdesýdi mazmundy ári ashyq ótti dep sıpattady.
Djared Kýshner Ýkraına máselesi boıynsha kelissózderde «úmit uıalatatyn ilgerileýshilikke» qol jetkizilgenin málimdedi. Ol bul týraly «H» áleýmettik jelisindegi paraqshasynda jazdy.
- Áli de atqarylatyn jumys kóp. Alaıda bizde bul soǵysty eńserip, kelesi urpaqtarǵa uzaq merzimdi beıbitshilik, qaýipsizdik pen órkendeýdiń negizin qalaý úshin naqty múmkindik bar, — dep atap ótti ol.
Buǵan deıin Vladımır Pýtınniń kezdesý barysynda AQSh prezıdenti Donald Tramptyń arnaıy ókiline Reseı men Ýkraına arasyndaǵy qaqtyǵys máselesine kóńil bólgeni úshin alǵys aıtqany habarlanǵan bolatyn.
