Reseı 5 adamnyń ómirin qıǵan jol apatyna kináli qazaqstandyqty qamaý merzimin uzartty
ASTANA. QazAqparat - Reseıdiń Chelıabi oblysynda bes adamnyń ólimine ákep soqqan jol apatyna kináli qazaqstandyqty qamaýda ustaý merzimi sáýir aıyna deıin uzartyldy, dep habarlaıdy QazAqparat tilshisi.
Bul týraly QR Syrtqy ister mınıstrliginiń resmı ókili Aıbek Smadııarov Astanada ótken baspasóz máslıhatynda aıtty.
"2018 jyldyń 29 qarashasynda Ekaterınbýrg qalasynyń mańynda Qazaqstan azamaty jol-kólik apatyna ushyraǵan bolatyn. Ol úlken júk kóligin basqarǵan jáne tirkemesi joldyń qarsy jolaǵyna shyǵyp ketken. Saldarynan tirkeme úsh avtokólikpen soqtyǵysyp, Reseıdiń 5 azamaty mert boldy", - dedi resmı ókil.
Onyń aıtýynsha, kúdikti - Túrkistan oblysynyń týmasy. Qazirgi ýaqytta ol Ekaterınbýrg qalasynyń tergeý oqshaýlaǵyshynda otyr. "Ony qamaýda ustaý merzimi 2019 jyldyń 1 sáýirine deıin uzartyldy. Bizdiń konsýl múmkindiginshe qonsýldyq-quqyqtyq qoldaý kórsetip jatyr jáne bul máseleni óz baqylaýyna aldy", - dedi ol.
Mınıstrliktiń habarlaýynsha, jol-kólik apaty Chelıabi-Ekaterınbýrg tas jolynyń 108-shaqyrymynda bolǵan. 1995 jyly týǵan Qazaqstan azamaty tirkemesi bar Volvo júk kóligin aıdaǵan jáne tirkeme joldyń qarsy jolaǵyna shyǵyp ketip, TATA avtokóligin soqqan. Keıinirek tirkeme Land Rover jáne «Gazel» kólikterimen soqtyǵysqan. Saldarynan Land Rover júrgizýshisi men úsh jolaýshysy jáne TATA júrgizýshisi mert boldy.
