Reseı 2033 jylǵa deıin Qazaqstan aýmaǵy arqyly 100 mln tonna munaıyn Qytaıǵa eksporttamaq
ASTANA. KAZINFORM – Májilis Reseı munaıyn Qazaqstan arqyly Qytaıǵa tasymaldaý kelisimine enetin ózgeristerdi maquldady.
«Joǵaryda atalǵan kelisimge 2013 jylǵy 24 jeltoqsanda qol qoıyldy jáne 2014 jylǵy shildede kelisim sharttary men Taraptardyń ýaǵdalastyqtaryna sáıkes ratıfıkatsııalandy.
Taraptar kelisimdi 2024 jyldan 2033 jylǵa deıin uzartýǵa ózara múddelilik bildirdi jáne 2013 jyly qol qoıylǵan kelisimge ózgerister engizý boıynsha tıisti kelissózderge kiristi.
2014 jyldan 2023 jylǵa deıingi kezeńde Reseı munaıynyń QR aýmaǵy arqyly QHR-ǵa jalpy tranzıti 90 mln 899 myń 271 tonnany qurady. Jalpy túsim 1 mlrd 327 mln dollar nemese 501 mlrd 981 mln 476 myń 65 teńgeni qurady», - dedi Almasadam Sátqalıev.
Mınıstrdiń sózine qaraǵanda, Reseı tarapy «Rosneft» SNPS-men aldaǵy 10 jylda 100 mln tonna munaı jetkizý týraly kelisimdi uzartyp, qol qoıǵanyn habarlap otyr.
«Kelissózderdiń qorytyndysy 2023 jylǵy 16 maýsymda Sankt-Peterbýrg qalasynda kelisimge ózgerister engizý týraly qol qoıylǵan hattama boldy.
Kelissózder kezinde TON-2 marshrýtynyń ýchaskesin kelisimge engizý jáne «tonnasyna 2 dollar» tarıfin belgileý usynyldy. Joǵaryda atalǵan barlyq ózara usynystar taraptar arasynda kelisildi.
Kelisimdi uzartý Pavlodar munaı-hımııa zaýytynan Omby-Pavlodar munaı qubyry arqyly Qazaqstanǵa túsetin munaımen júkteýdi qamtamasyz etedi. Eshqandaı táýekelder joq.
2024 jyldan 2033 jylǵa deıingi kezeńde eki ýchaske boıynsha QR aýmaǵy arqyly QHR-ǵa Reseı munaıynyń tranzıtinen kútiletin túsim – 1 mlrd 851 mln dollar. Al almastyrýdan túsken paıdany eskersek, túsim kólemi 1 mlrd 710 mln dollar bolady», - dedi Energetıka mınıstri.
