Reseı 2026 jyly astyqty eksporttaýǵa kvota belgiledi
MÁSKEÝ. KAZINFORM — Reseı Úkimeti 2026 jyldyń birinshi jartyjyldyǵyna astyq eksportyna kvota belgiledi, dep habarlaıdy agenttik tilshisi RF Úkimetiniń saıtyna silteme jasap.
Habarlamada aıtylǵandaı, Reseıden Eýrazııalyq ekonomıkalyq odaqtan tys elderge bıdaı, meslın, arpa jáne júgeri eksporttaýǵa arnalǵan tarıftik kvotanyń jıyntyq kólemi 20 mln tonnany quraıdy. Al qarabıdaıdy eksporttaýǵa arnalǵan kvota kólemi — 0 tonna.
Kvotalar 2026 jylǵy 15 aqpannan 30 maýsymǵa deıin qoldanysta bolady.
Bul sheshim ishki astyq naryǵy men shetelge tasymaldaý arasyndaǵy ońtaıly tepe-teńdikti saqtaýǵa múmkindik berý maqsatynda qabyldandy. Ol Reseı naryǵyndaǵy astyq daqyldaryn óndirý men tutynýdyń boljamdy kórsetkishteri eskerile otyryp bekitilgen.
Tarıftik kvotalar Úkimet sheshimderiniń negizinde shetel memleketterine halyqaralyq gýmanıtarlyq kómek kórsetý úshin astyq eksporttaýǵa qoldanylmaıdy.
Astyq daqyldaryn eksporttaýǵa arnalǵan kvota mólsheri 2025 jyldyń qazan aıynda ekonomıkalyq damý jáne ıntegratsııa jónindegi úkimettik komıssııanyń kedendik-tarıftik jáne tarıftik emes retteý jónindegi qosalqy komıssııasynyń otyrysynda bekitilgen.
Astyq eksportyn kvotalaý tetigin RF Úkimeti 2021 jyly engizgen. Kvota sheńberinde astyq eksportyna baǵaǵa qaraı ózgeretin baj salyǵy qoldanylady.
Buǵan deıin Qazaqstannyń 64,6 mlrd AQSh dollaryna taýar eksporttaǵany týraly jazylǵan.