RES-2026: BUU Ortalyq Azııadaǵy qaldyqtardy qaıta óńdeý máselesin kóterdi
ASTANA. KAZINFORM — Qaldyqtardy qaıta óńdeý sektoryn damytý kerek. Bul týraly elordadaǵy Óńirlik ekologııalyq sammıtte BUU Bas hatshysynyń orynbasary jáne BUU Qorshaǵan orta baǵdarlamasynyń atqarýshy dırektory Inger Andersen málim etti.
— Kúndelikti ómirde paıdalanyp júrgen zattardy negizinen jer qoınaýynan shyqqan shıkizatty óńdeý arqyly shyǵaryp jatyrmyz. Degenmen, eskirgen nemese isten shyqqan taýarlardy keıinnen qoqysqa laqtyra salamyz. Degenmen, osy úderisti ózgerte alamyz, ıaǵnı shıkizatty óndirip, ony óńdep, keıin jaı ǵana tastaı salý protsesimen shektelý — ornyqty modelge jatpaıdy. Sebebi jınaqtalyp jatqan qaldyqtar álem ekologııasyn, bolashaǵymyzdy nasharlatyp jatyr. Sondyqtan osy qaldyqtardy qaıta óńdeý men aınalym ekonomıkasyn keńeıtýge ekpin qoıý kerek. Qazir resýrstardy jer qoınaýynan alý qarqyndy júrip jatyr, taýarlar men ónimderge suranys artyp keledi. Eger osy qalypta jalǵasa berse, onda aldaǵy kezeńde saldary aýyr daǵdarys bolýy yqtımal, — dedi Inger Andersen.
Osy oraıda ol mundaı syn-qater Ortalyq Azııaǵa da qaýip tóndiretinin aıtty.
— Bul óńirdegi halyq sanynyń ósip kele jatqanyn eskersek, qaldyqtar kólemi de artady. Bul qaýipke aınalym ekonomıkasynyń ıdeıasy jaqsy jaýap bolar edi. Osy rette, jańa jumys oryndaryn qurýǵa, jańa múmkindikterdi ashýǵa, ekonomıkalyq qundylyqtardy qalyptastyra alamyz. Atap aıtqanda, materıaldardy qaıtalap paıdalaný tájirıbesin keńeıtý óte mańyzdy. Jalpy, Ortalyq Azııa elderi osy reformalarǵa kirisip ketti. Bul óz kezeginde jańa bıznes modeldi damytýǵa yqpal etedi, — dedi BUU Bas hatshysynyń orynbasary.
Budan buryn habarlanǵandaı, búgin elordada Memleket basshysy Qasym-Jomart Toqaevtyń qatysýymen «Ornyqty bolashaqqa ortaq kózqaras» taqyrybymen Óńirlik ekologııalyq sammıt (ÓES) jumysyn bastady.
