RES — 2026: Ázerbaıjan Kaspıı teńizi mańyndaǵy elderdiń kúsh-jigerin biriktirýge shaqyrdy
ASTANA. KAZINFORM – Ázerbaıjan jaǵy Qazaqstannyń bastamasymen BUU quramynda Halyqaralyq sý uıymyn qurý usynysyn qoldaıdy. Bul týraly elordadaǵy Óńirlik ekologııalyq sammıtte Ázerbaıjan Premer-mınıstri Álı Asadov málim etti.
– Osy sammıttiń nátıjesi qorshaǵan ortaný qorǵaý baǵytynda tájirıbe júzinde iske asatyn bastamalardy daıarlaýǵa, óńirlik yntymaqtastyqty nyǵaıtýǵa yqpal etetinine senimdimiz. Klımattyń ózgerýi, taza sý tapshylyǵy máselesiniń ýshyǵýy, sý resýrstaryna júktemeniń artýy saldarynan qarqyn alyp kele jatqan jahandyq syn-qaterler jaǵdaıynda sý qaýipsizdigi máselesi halyqaralyq kún tártibinde basym mańyzǵa ıe boldy. Osy oraıda Ázerbaıjan jaǵy Qazaqstannyń bastamasymen BUU quramynda Halyqaralyq sý uıymyn qurý usynysyn qoldaıdy, - dedi Á. Asadov.
Bul turǵyda ol osy óńirdegi eń ózekti máseleniń biri Kaspıı teńizi deńgeıiniń tómendeýine qatysty ekenin atap ótti.
– Osy syn-qaterdi tıimdi eńserý úshin Kaspıı teńizi mańyndaǵy elderdiń yntymaqtastyǵyn nyǵaıtý mańyzdy. Bul rette Ázerbaıjannyń bastamasymen Qazaqstanmen, Reseımen, Túrikmenstanmen ekijaqty jumys toptary quryldy. Onyń aıasynda Kaspıı teńiziniń taıazdanýy sebepterin anyqtaý jáne tıisti is-sharalardy ázirleý qadamdary eskerilgen. Teńizdiń tartylýyna klımattyń ózgerýi de eleýli túrde áser etip otyr, - dedi Ázerbaıjan Premer-mınıstri.
Aıta keteıik, Dúnıejúzilik bank Kaspıı teńizine qatysty iri ekologııalyq jobany qarjylandyrýdy maquldady.
Buǵan deıin Ekologııa jáne tabıǵı resýrstar mınıstri Erlan Nysanbaev Kaspıı teńiziniń jaı-kúıine qatysty pikir bildirgenin jazǵan edik.
