Republic Day jáne Bereke Fest aktsııalarynyń sońǵy kúni: merekelik jeńildikti paıdalanyp úlgerińiz
ASTANA. KAZINFORM — 27 qazanda elimizde Respýblıka kúnine oraı uıymdastyrylǵan Republic Day jáne Bereke Fest respýblıkalyq aktsııalary aıaqtalady. Tutynýshylardyń taýarlardy arnaıy baǵamen satyp alyp, saýda oryndarynyń merekelik usynystaryn paıdalanyp úlgerýine bir kún qaldy.
Elimizdiń barlyq óńirin qamtyǵan aýqymdy aktsııalarǵa saýda-oıyn-saýyq ortalyqtary, saýda úıleri men saýda jelileri, sondaı-aq marketpleıster qatysyp jatyr. Taýarlardyń jekelegen sanattaryna 50%-ǵa deıin jeńildikter qarastyrylǵan.
Aktsııalarǵa 649 saýda nysany qosyldy. Onyń ishinde Republic Day aıasynda 232 saýda-oıyn-saýyq ortalyǵy, saýda ortalyǵy men saýda úıi jáne 417 saýda jelisi qatysyp jatyr.
Republic Day aktsııasy aıasynda satyp alýshylarǵa kıim-keshek, aıaq kıim, turmystyq tehnıka, úıge qajetti zattar jáne basqa da taýarlar arnaıy baǵamen usynylyp jatyr. Al Bereke Fest aktsııasy azyq-túlik, kúndelikti tutyný taýarlary men turmystyq hımııa ónimderin tıimdi baǵamen satyp alýǵa múmkindik beredi.
Saýda jáne ıntegratsııa mınıstrligi jergilikti atqarýshy organdarmen jáne aýmaqtyq departamenttermen birlesip, aktsııalardy uıymdastyryp, saýda kásiporyndaryn tartý boıynsha úılestirý jumystaryn júrgizdi.
Eske salamyz, 27 qazan - Republic Day jáne Bereke Fest aktsııalarynyń sońǵy kúni. Al jeńildikter mólsheri, aktsııaǵa qatysatyn taýarlardyń assortımenti jáne olardy satyp alý sharttary saýda nysanyna baılanysty ártúrli bolýy múmkin.
Respýblıka kúnine oraı elimizdiń barlyq óńirindegi saýda ortalyqtarynda aktsııa bolyp jatqanyn jazǵan edik.
