Reprodýktıvtik densaýlyq aptalyǵy aıasynda 300 myńnan astam adam qamtyldy
ASTANA. KAZINFORM — Kóktemniń sońǵy aptasynda Qazaqstan Respýblıkasy Densaýlyq saqtaý mınıstrliginiń bastamasymen elimizdiń barlyq óńirlerinde bolashaq urpaqtyń densaýlyǵyn saqtaýǵa jáne halyqtyń reprodýktıvtik saýattylyǵyn arttyrýǵa baǵyttalǵan Reprodýktıvtik densaýlyq aptalyǵy sheńberinde túrli is-sharalar ótkizildi. Bul týraly DSM-niń baspasóz qyzmeti málim etti.
Naýqannyń negizgi maqsaty azamattardyń reprodýktıvtik densaýlyqty qorǵaý, jeke gıgıena, jynystyq jetilý, jynystyq jolmen beriletin ınfektsııalardyń (JJBI), adam papıllomasy vırýsynyń (APV) aldyn alý, sondaı-aq otbasyn josparlaý jáne óz densaýlyǵyna jaýapkershilikpen qaraý máseleleri boıynsha habardarlyǵyn arttyrý boldy.
Qazaqstannyń barlyq óńirlerinde medıtsınalyq-sanıtarııalyq alǵashqy kómek uıymdary men jastar densaýlyq ortalyqtarynyń bazasynda Ashyq esik kúnderi uıymdastyrylyp, onyń sheńberinde jasóspirimder men jastar gınekologtardan, ýrologtardan, dermatovenerologtardan, psıhologtardan jáne basqa da beıindi mamandardan konsýltatsııa alý múmkindigine ıe boldy.
— Aptalyq baǵdarlama otbasyn josparlaý jáne júktilikke deıingi daıyndyq, erler men áıelder densaýlyǵy, jasóspirimder men jastardyń reprodýktıvtik densaýlyǵyn saqtaý, jynystyq jolmen beriletin ınfektsııalardyń aldyn alý, sondaı-aq jatyr moıny obyry men adam papıllomasy vırýsynyń profılaktıkasy máselelerin qamtydy, — delingen habarlamada.
Naýqannyń qorytyndysy boıynsha beıindi mamandardyń qatysýymen 3 myńnan astam aǵartýshylyq is-sharalar men dárister ótkizildi. Іs-sharalarmen qamtylǵandardyń jalpy sany 300 myńnan asty, onyń ishinde 70 myńnan astam er adam, 137 myń áıel jáne 110 myń jasóspirim bar.
Halyqtyń eń joǵary belsendiligi men qyzyǵýshylyǵy Almaty jáne Shymkent qalalarynda, sondaı-aq Túrkistan oblysynda baıqaldy. Naýqan barysynda jasóspirimder men jastarǵa erekshe nazar aýdarylyp, olarǵa densaýlyqty saqtaý, aýrýlardyń aldyn alý jáne bolashaq ata-analyqqa jaýapkershilikpen qaraý jóninde senimdi aqparatqa qol jetkizý múmkindigi berildi.
Іs-sharalardy ótkizýge Qazaqstannyń jynystyq jáne reprodýktıvtik densaýlyq qaýymdastyǵy da qosyldy. Uıym áleýmettik jelilerde tikeleı efırler, master-klastar, aǵartýshylyq kezdesýler jáne beıindi mamandardyń qatysýymen saraptamalyq baıandamalar uıymdastyrdy.
Aıta keteıik, elde balalar onkologııasynda zamanaýı emdeý ádisteri engizilip jatyr.
