Repressııa aýyrtpalyǵyn kórgen qazaq sýretshisiniń tuńǵysh jeke kórmesi ótedi
Kórme jetekshisi Galına Syrlybaevanyń aıtýynsha, «Beımálim Qojahmet Qojyqov. 1910-1953» atty biregeı kórme saıası qýǵyn-súrginniń bastalǵanyna 80 jyl tolýyna da arnalady. Sýretshiniń birinshi ret uıymdastyrylyp otyrǵan jeke kórmesinde mýzeı qorynan jáne jeke kollektsııalardan alynǵan 70-ten astam týyndy kórermen nazaryna usynylady.
Sýretshiniń ómiri uzaq bolmaǵanymen, ol mańyzdy da mándi oqıǵalarǵa toly boldy. Qojahmet Qońǵyrqojauly Qyzylorda qalasynda dúnıege keldi. Ákesi - Qońyrqoja, muǵalim, anasy - Látıpa, halyq sheberi, balalarynyń shyǵarmashylyq ynta-talaptaryn meılinshe qoldap otyrdy. Qojahmet te, qalǵan úsh inisi de ónerdiń barlyq túriniń damýyna zor úles qosyp, respýblıkadaǵy belgili sýretshi, kınorejısser, músinshi boldy. Qojahmettiń daryny óte erte baıqaldy. 1926 jyly mektep bitirgen ol birden Qazaqstan Halyq aǵartý komıssarıatynan Máskeýdegi Búkilodaqtyq kórkemsýret-tehnıkalyq sheberhanalar janyndaǵy kýrsqa joldama alady. Osy jyldardaǵy astanada ótken kórkemdik ómir erekshe qyzý qarqynmen ótti.
Q. Qojyqov eńbek jolyn ári grafık, ári keskindemeshi bolýdan bastaıdy, baspalarda qyzmet etedi, balalar kitaptary men teatr spektaklderin bezendiredi, ózekti taqyryptarǵa karıkatýralar salady, beıneleý óneri tehnıkýmynda sabaq beredi. Óleń jazady. Jańa zaman, jańa dáýir tynysy 1935-1937 jyldary salynǵan akvarelder toptamasynda kórinis tapty. 1930-jyldarǵa tán taqyryp ábden saraptalyp bolsa da, sýretshi osy taqyrypty jańa qyrynan asha bildi. Ol eńbek protsesiniń yrǵaǵyna jaýap beretin erekshe ekspressıvtik mánerde sheshildi, al aıryqsha tústik úılesim - senimdi qoldan shyqqan dınamıkalyq sarǵysh-qyzǵylt, sary jáne túrli reńktegi kógildir boıaýlar adam balasynyń jer betindegi bolmysynyń artyqshylyǵyn bildiredi.
Sýretshi 1937 jyly tutqyndalyp, 10 jyl Polıar aımaǵyna aıdalyp, shyǵarmashylyq belsendiligi úzilip qaldy. Ol 1943 jyly Almatyǵa densaýlyǵynan aırylyp, óte aýyr halde oralady. Solaı bolsa da, jumysqa kirisip, sol kezdegi barlyq kórmelerge belsene qatysady. Itteri artynan erip, otarly qoıyn baǵyp júrgen shopandar, atta otyrǵan kisiler akvarelderdiń týyndaýyna shabyt kózi bolǵan. Ómirdiń aýyr synaqtaryna qaramastan, ondaǵy túster de burynǵydaı senimmen órshil ún qatady, kún shapaǵy paraq betine túgeldeı shashyraı túsken. Sýretshiniń qylqalamy da jigerli, shyǵarmashylyq tásildiń qýaty men mánerliligi de saqtalǵan.
Qojahmet Qojyqov tamasha sýretshi boldy. Obrazdy jasaǵanda, artyq syzyq bolmaıtyn. Óziniń kompozıtsııalyq sheshimin de anyq kórsetip, adam men janýardyń músinin de, qorshaǵan ortany da asa dál syzyqtarmen beınelegen sýretshiniń jaryqqa shyqpaǵan bolashaq keskindemelik kompozıtsııalarynyń qaryndashpen salynǵan nobaılary bolar, birdeı formattaǵy birneshe sýreti saqtalyp qalǵan.
Ómirdiń aýyr synaǵy sýretshiniń taǵdyryna salqynyn tıgizip, óziniń kórkemdik áleýetin tolyqtaı kórsete almastan ómirden erte ketti.