Reportaj: Nur-Sultanda koronavırýs naýqastaryn emdeıtin aýrýhana salynyp jatyr
Tótenshe jaǵdaı kezinde naýqastardy qabyldaıtyn 200 oryndyq gospıtal qalalyq týberkýlezge qarsy dıspanser mańynda turǵyzylady. «BI Group» qurylys kompanııasy bul nysandy 10-12 kúnde aıaqtaýdy josparlap otyr. Ol úshin 500-ge jýyq qurylysshy 3 aýysymmen táýlik boıy jumys isteýde.
«Qazirgi ýaqytta Nur-Sultan, Almaty jáne Shymkent qalalarynda úsh jobany qolǵa aldyq. Nur-Sultan men Shymkenttegi joba 200 orynan qarastyrylǵan jáne árqaısysynda 20 oryn ıntensıvti terapııaǵa arnalmaq. Almatyda 280 oryn bolsa, onyń 28-i ıntensıvti terapııaǵa beriledi. Nur-Sultandaǵy gospıtal Modex zaýyty jasaıtyn modýlderden qurylady (...) Mundaı monolıttik qurylystardy 50-70 jyl boıy paıdalanýǵa bolady», - dedi joba dırektory Arman Lesbekov tilshilerge bergen suhbatynda.
Onyń aıtýynsha, ıntensıvti terapııa palatalaryn jabdyqtaýda Dúnıejúzilik densaýlyq saqtaý uıymynyń barlyq talaby eskerilgen. Sonymen birge, Arman Lesbekov Almaty men Shymkenttegi aýrýhanalardyń aıyrmashylyǵy týraly aıtyp berdi.
«Almatydaǵy gospıtal vahtalyq qalashyq tıpinde jasalady. Ýaqyt pen bıýdjettiń tyǵyz bolýynan batysta munaı jumystary úshin qoldanylatyn qalashyq úlgisin aldyq. Barlyq úsh keshende de taza mekemeler kesheni men medıtsınalyq gazdar qarastyrylǵan». - dedi ol.
Shymkenttegi aýrýhanany salýda konteınerlik tıpten temirbetonǵa deıingi barlyq nusqalar qarastyrylǵan.
«Qazir de Shymkentte aýrýhana formaty talqylanyp jatyr. Sondyqtan, talqylaý aıaqtalǵan soń, qarqyndy jumys istep, qalǵan ýaqytty qýyp jetemiz degen oıdamyn. Barlyq aýrýhanada dárigerlerge arnalǵan ordınatorlyq bólmeler, kabınetter bolady. Máıit saqtaıtyn oryndar da qarastyrylǵan», - dedi A. Lesbekov.
Eske sala ketsek, 3 sáýirde TJ rejımin qamtamasyz etý jónindegi memlekettik komıssııa Qazaqstannyń úsh iri qalasynda juqpaly aýrýlar aýrýhanalaryn salýdy uıǵardy. Onyń qurylysyna tez turǵyzylatyn qurylymdar qoldanylmaq.
