Renjisip qalǵan adamdar Naýryzda tatýlasyp, tabysýy qajet- depýtat D. Qusaıynov
ASTANA. 18 naýryz. QazAqparat /Aıdyn Báımen/ - Ulystyń uly kúni qarsańynda ulttyq merekemizdiń mańyzdylyǵy, salt-dástúrdiń ozyq úlgileri týraly árbir Qazaqstan azamaty óz pikirin bildirýde.
QazAqparat tilshisiniń suraqtaryna jaýap bergen QR Parlamenti Májilisiniń depýtaty Daýylbaı Qusaıynov Naýryz meıramyna qatysty oılaryn aıtyp berdi.
- Siz buryn Qaraǵandy oblysynda eńbek ettińiz. Saryarqa óńirinde Ulystyń uly kúnin qarsy alýdyń ózindik erekshelikteri týraly aıtyp berseńiz? Naýryz týraly usynystaryńyz bar ma?
- Men Qaraǵandy oblysynyń Nura aýdanynda biraz jyldar boıy aýdandy basqardym, bul óńirdiń ereksheligi qys erte bastalyp, kesh shyǵady. Naýryz kelgende dalada áli qar jatady. Sol sebepten birqatar qıyndyqtary da bar. 90-jyldardyń orta kezinde «Naýryzdy keıin ótkizeıik, jer aıaǵy keńip, qar ketkennen keıin, kún jylyǵan soń durys bolatyn shyǵar» degen usynystar boldy. Biraq men bul usynysty qoldaǵan joqpyn. Naýryz ár kez óz ýaqytynda toılanǵany jón. Der kezinde atalyp ótýi tıis. Búgingi tańda resmı túrde memlekettik mereke retinde úsh kún berilip otyr. Sol sebepten Ulystyń uly kúnine memleket tarapynan da aıryqsha nazar aýdarylǵanyn kóremiz.
- Naýryzda qaıyrymdylyq sharalaryn ótkizgen jón dep aıtylady. Siz Naýryzdy qalaı qarsy alǵan durys dep esepteısiz?
- Naýryzda qaıyrymdylyq jasaý, alańdarǵa, kóshelerge jas taldar otyrǵyzý óte oryndy bastama dep bilemin. Ár kóktemniń basynda jas taldar eksek, ol on shaqty jyldyń ishinde úlken máýeli aǵashqa aınalady. Elimizdiń aýa raıy jaqsarýyna, ekologııalyq jaǵdaıy túzelýine ol da bolsa, qosylǵan bir úles. Al adamdarǵa, ásirese, múgedek jandarǵa, qarııalarǵa qamqorlyq jasaý - azamattyq paryz.
Sol sııaqty buryn bir máselelerge kózqarastary kelispeı renjisip qalǵan adamdar Naýryzda tatýlasyp, tabysýy qajet. Birin-biri keshire bilýi kerek. Arazdasyp júrgen adamdardy bilgen aınalasyndaǵy áriptesteri olardy qaıta tatýlasýǵa yqpal etkeni durys. Sonda adam janynyń izgiligi, asyl qasıetteri anyq baıqalady.
- Endi elge arnalǵan quttyqtaýyńyzdy jetkizseńiz?
- Bul bizdiń erteden kele jatqan dástúrli merekemiz. Naýryz meıramyn halyq jyl saıyn asyǵa kútedi. Kún men túnniń teńesken kezi. Aldymyzda shýaqty kóktem kele jatyr. Barlyq dúnıe jańaryp jandanady. Barlyq Qazaqstan halqyna tileıtinim osy merekelerińiz qutty bolsyn! Aq mol bolsyn! Otbastaryńyz aman bolyp, jetistikterge jete berýlerińizge tilektespin! Jańa bastalǵan jylymyz baıandy bolsyn!
- Aıtqanyńyz kelsin!
