Renýar mýzeıine ury tústi: 9 mln eýrolyq kartınalar qoldy boldy
ASTANA. KAZINFORM — Frantsııanyń Kan-sıýr-Mer qalasyndaǵy Per Ogıýst Renýar mýzeıinen eki kartına urlandy. Qalalyq bıliktiń málimetinshe, mýzeıge eki qylmysker basyp kirgen. Bul týraly BBC jazdy.
Bastapqyda tórt kartına urlandy degen aqparat taraǵan. Alaıda keıin eki týyndyny qylmyskerler qashyp bara jatqan kezde mýzeıdiń baqshasyna tastap ketkeni anyqtaldy.
Nice-Matin basylymynyń málimetinshe, urlanǵan tórt kartınanyń barlyǵyn Renýardyń ózi salǵan. Olardyń qatarynda 1905 jylǵy «Koko kitap oqyp otyr», 1910 jylǵy «Kolonna Romano hanymnyń portreti», 1895 jylǵy «Stıven Pıshon hanymnyń portreti» jáne 1886 jylǵy «Qudyq basyndaǵy qyz» týyndylary bar.
Keıin Kan-sıýr-Mer bıligi qylmyskerlerdiń ózderimen birge eki kartınany alyp ketkenin naqtylady. Olar – «Kolonna Romano hanymnyń portreti» men «Qudyq basyndaǵy qyz».
Mýzeıdegi dabyl jergilikti ýaqyt boıynsha tańǵy saǵat 5:48-de iske qosylǵan. Beınebaqylaý kameralary ǵımarat ishinde eki bógde adamnyń júrgenin tirkegen. Polıtsııa dabyldan bes mınýt ótken soń mýzeıge jetkenimen, kúdiktiler bul ýaqytta oqıǵa ornynan qashyp úlgergen.
Kan-sıýr-Mer meri Brıan Massonnyń aıtýynsha, qylmyskerler mýzeı aýmaǵyna sym qorshaýdy kesý arqyly kirgen. Polıtsııa sırenalary men dabyldyń iske qosylýy olardy qashýǵa májbúr etken.
Qazir qylmyskerlerdi izdeý jumystary júrgizilip jatyr. Іsti Nıtstsadaǵy uıymdasqan qylmysqa qarsy kúres bólimi tergep jatyr.
Merdiń aıtýynsha, bastapqy esep boıynsha urlanǵan kartınalardyń jalpy quny shamamen 9 mln eýrony (10,5 mln dollar).
Renýar mýzeıi týraly
Renýar mýzeıi Frantsııanyń Lazýr jaǵalaýyndaǵy Kan-sıýr-Mer qalasynda, Nıtstsadan birneshe mınýttyq jerde ornalasqan. Mýzeı 1960 jyly ashylǵan jáne sýretshi ómiriniń sońǵy 11 jylyn ótkizgen burynǵy jeke úıinde ornalasqan.
Úı Jerorta teńizine qaraıtyn tóbede tur. Ǵımarattyń aınalasynda záıtún jáne tsıtrýs aǵashtary ósetin shaǵyn baq bar.
Mýzeı qorynda Renýardyń 12 kartınasy men ondaǵan músini saqtalǵan. Sonymen qatar munda Per Bonnar men Raýl Dıýfı sekildi basqa da sýretshilerdiń týyndylary qoıylǵan.
Bǵan deıin Vena mýzeıinen 600-den astam gaýhar tasy bar alqa urlanǵan bolatyn.
