Renat Bekturov: Basty mıssııa — ádiletti Qazaqstan qurý
ASTANA. KAZINFORM — Astanada elimizde qurylyp jatqan «Ádilet» jańa saıası partııasynyń quryltaı sezi ótti.
Shara sońynda Astana halyqaralyq qarjy ortalyǵynyń basqarýshysy, «Ádilet» saıası partııasy basqarýshylar tobynyń múshesi Renat Bekturov buqaralyq aqparat quraldarynyń suraqtaryna jaýap berdi.
Onyń aıtýynsha, jańa partııanyń basty mıssııasy — ádiletti Qazaqstan qurý. Jalpy, «Ádilet» partııasynyń jarǵysy 18 bólimnen turady. Al partııa baǵdarlamasynda bes negizgi qundylyq aıqyndalǵan.
— Birinshisi — ádilettilik, ekinshisi — otansúıgishtik, úshinshisi — eńbekqorlyq, tórtinshisi — jaýapkershilik, besinshisi — progress. Bul qundylyqtar tek qaǵaz júzinde qalmaı, qoǵamda jáne ekonomıka salasynda naqty kórinis tabýy tıis. Sondyqtan bizdiń basty 10 basymdyǵymyz aıqyndalǵan. Sonyń biri — zań men tártip, — dedi ol.
Alaıda «Ádilet» partııasy QR Ádilet mınıstrliginiń tirkeýinen áli ótpegen. Renat Bekturovtyń aıtýynsha, qujattar jınaý protsesi júrip jatyr eken.
— Quryltaı sezinen keıin biz partııany resmı tirkeý úshin qujattar tapsyramyz. Zań boıynsha partııa qurý úshin keminde bes myń múshe bolýy qajet. Bizdiń qoldaýshylarymyz bul talaptan eki ese kóp — on myńnan asady. Degenmen tirkeýden ótý-ótpeýin kepildikpen aıtý múmkin emes. Biz barlyq qujattardy zań talaptaryna sáıkes tapsyramyz, — dedi Renat Bekturov.
Jýrnalısterdiń «básekelesterińiz kim?» degen suraǵyna ol qysqasha jaýap berdi:
— Biz eshkimmen básekege túspeımiz. Basqa saıası partııalardy talqylaýdan aýlaqpyz. Bizdiń óz baǵytymyz, óz ustanymymyz bar. Bizdiń qundylyqtarymyz ben maqsattarymyzǵa 10 myńnan astam adam qoldaý bildirip otyr, — dedi «Ádilet» saıası partııasy basqarýshylar tobynyń múshesi .
Aıta keteıik, Aıbek Dádebaı «Ádilet» partııasynyń tóraǵasy bolyp saılandy.
