Renat Aıtaev Prezıdent Ákimshiliginde jańa qyzmetke taǵaıyndaldy

ASTANA. KAZINFORM – Memleket basshysynyń ókimimen Renat Aıtaev QR Prezıdenti Ákimshiligi Memlekettik baqylaý bóliminiń meńgerýshisi laýazymyna taǵaıyndaldy, dep habarlady Aqorda.

v
Foto: Úkimet

- Memleket basshysynyń ókimimen Renat Qurmetjanuly Aıtaev Qazaqstan Respýblıkasy Prezıdenti Ákimshiliginiń Memlekettik baqylaý bóliminiń meńgerýshisi laýazymyna taǵaıyndaldy, delingen aqparatta.

Renat Aıtaev 1976 jyly 10 qyrkúıekte Óskemen qalasynda dúnıege kelgen.

1998 jyly D. Serikbaev atyndaǵy Shyǵys Qazaqstan memlekettik tehnıkalyq ýnıversıtetin ınjener-ekonomıst mamandyǵy boıynsha, 2001 jyly Qazaq memlekettik zań akademııasyn zańger mamandyǵy boıynsha támamdaǵan.

Eńbek jolyn 1998 jyly «Demal-Shyǵys» JShS-de ekonomıka jáne qarjy jónindegi dırektor qyzmetinen bastaǵan.

1999-2000 jyldary Shyǵys Qazaqstan oblysynyń statıstıka organdarynda jumys istedi.

2000-2003 jyldary Memlekettik kirister mınıstrliginde túrli qyzmet atqardy. Al 2003-2008 jyldary Qarjy mınıstrliginiń Kedendik baqylaý komıtetinde basqarma bastyǵy boldy.

2008-2009 jyldary Eńbek jáne halyqty áleýmettik qorǵaý mınıstrliginiń Aqparattyq qamtamasyz etý departamentin basqardy.

2009-2010 jyldary Indýstrııa jáne saýda mınıstrliginde salaaralyq úılestirý jáne ındýstrııalyq saıasat departamentteriniń dırektory qyzmetterin atqardy.

2010-2017 jyldary Premer-mınıstr Keńsesiniń Indýstrııalyq-ınnovatsııalyq damý bóliminde meńgerýshiniń orynbasary, keıin bólim meńgerýshisi boldy.

2017-2019 jyldary Premer-mınıstr Keńsesi basshysynyń orynbasary ári ádep jónindegi ýákil qyzmetin atqardy.

2019-2022 jyldary Prezıdent Ákimshiligi basshysy hatshylyǵynyń meńgerýshisi boldy.

2022 jyldyń aqpan aıynan bastap Parlament Májilisi apparatynyń basshysy qyzmetin atqarǵan.

«Qurmet» (2013) jáne «Parasat» (2022) ordenderimen, sondaı-aq ІІІ dárejeli «Eýrazııalyq ekonomıkalyq odaqty qurýǵa qosqan úlesi úshin» medalimen marapattalǵan.

Sondaı-aq Memleket basshysynyń ókimimen Álıhan Qaıyrgeldiuly Jamsatov QR Prezıdenti Ákimshiligi Memlekettik baqylaý bóliminiń meńgerýshisi laýazymynan bosatyldy.

Aıta keteıik, buǵan deıin Marat Irmenov Ulttyq qaýipsizdik komıtetiniń tóraǵasy bolyp taǵaıyndaldy.