Renat Abdýlın: Jankúıerlerdi jerge qaratpaýǵa tyrysamyz
«Islandııa quramasy myqty qarsylas, olar bizdiń irikteý tobymyzdaǵy matchtarda 9 upaı jınady. Biz de qolymyzdan kelgendi aıanǵan joqpyz. Árıne, bizdiń qurama sheberlik jaǵynan eýropanyń jetekshi komandalaryna jol berýi múmkin, áıtse de biz qarsylastarymyzǵa laıyqty oıyn úlgisin tanytyp, óz jerimizde ótetin oıyn bolǵandyqtan jergilikti jankúıerler qoldaýy arqasynda alańnyń qaı tusynda bolmasyn saýatty áreket jasap, ústemdik kórsete alamyz dep oılaımyn», - deıdi R. Abdýlın.
Bul rette ulttyq qurama oıynshysy Qazaqstannyń fýtbol komandasy basqalarmen salystyrǵanda áldeqaıda jastaý ekenin, solaı bola tura kún saıyn sheberlikterimen shyńdalyp jatqanyn alǵa tartady. «Men jankúıerlerdi Qazaqstan men Islandııanyń oıynyn tamashalaýǵa shaqyramyn. Kez kelgen fýtbolshy úshin jankúıerler tarapynyń qoldaýyn seziný jaýapkershilikti arttyra túsedi. Sondyqtan da, biz alańda bar kúshimizdi salyp, jankúıerlerdi jerge qaratpaýǵa tyrysamyz», - dedi ol.
Eske sala keteıik, Qazaqstan men Islandııa arasyndaǵy irikteý týrnıriniń matchy elordadaǵy «Astana Arena» sport kesheninde 28 naýryzda saǵat 21:00-de ótedi.
