Rembrandttyń 30 mln eýroǵa baǵalanǵan sýretin 500 eýroǵa satyp jibergen
NUR-SULTAN. QazAqparat – Lej turǵyny 10 jyl buryn barda tanymaıtyn adamnan 500 eýroǵa satyp alǵan sýrettiń quny 30 mln eýro turatynyn endi ǵana bildi, dep habarlaıdy QazAqparat The Brussels Times gazetine silteme jasap.
«Shamamen 10 jyl buryn er adam Gerstal qalasyndaǵy barlardyń birinde qarjylaı qınalyp júrgen adammen kezdeısoq jolyǵyp, áńgimelesken. Artynsha belgııalyq azamat óziniń jańa tanysyna qarjylaı kómektesý úshin odan Iýsýs beınelengen sýretti 500 eýroǵa satyp alǵan», - dep jazady basylym.
Artynan er adam sýretti óziniń ónerge qyzyǵatyn tanysyna kórsetken. Ol bul sýretti satyp alynǵan baǵasynan áldeqaıda qymbat ekendigin aıtqan. Sýret saraptamaǵa jiberilip, quny 30 mln eýro dep baǵalandy. Mamandardyń aıtýynsha, týyndyda Rembrandt van Reınniń jumystaryna tán erekshelik bar.
Rembrandt (Rembrandt Harmens van Reın, 1606-1669 jyldar) – gollandııalyq sýretshi, órnekshi, sáýle men kóleńke sheberi, gollandııalyq sýret óneriniń altyn ǵasyrynyń iri ókili.
