«Rem» atty ovcharka Almaty oblysyndaǵy eń úzdik ıt atandy
TALDYQORǴAN. QazAqparat - Almaty oblystyq ІІD-niń Kınologııa ortalyǵynda «Rem» qyzmettik-ıisshil ıt 200-den astam qylmystyń ashylýyna úles qosqan. Nemis ovcharkasy ózge qyzmet ıtterinen kósh ilgeri keledi, dep habarlaıdy QazAqparat tilshisi.
Polıtsııa kapıtany, aǵa ınspektor-kınolog Marat Ramazanovtyń aıtýynsha, qazir ortalyqtaǵy ıtter birneshe baǵytta qyzmet etýge úıretilgen. Biri esirtki jáne jarylǵysh zattar izdeýge mashyqtansa, endi biri qylmyskerdi ustaý, kúzet-patrýldik qyzmetti atqarýǵa daǵdylanǵan. Al «Rem» bolsa - iz kesýshi. Kınolog 4 jyldan beri osy ıtpen aınalysyp keledi.
«It - adamnyń dosy» dep beker aıtpaıdy. Sondyqtan durys úıretilgen, jattyqtyrylǵan ıt adamǵa serik bolyp qana qoımaı, jedel-izdestirý jumystaryn jyldamdatady», - deıdi Marat Ramazanov.
Bıyldyń ózinde «Rem» 44 qylmysty ashýǵa kómektesken. Negizinen bótenniń múlkin urlaý faktileriniń izin sýytpaı taýyp otyrǵan. Ótken demalys kúnderi aqyldy ıt bir saǵattyń ishinde eki quqyqbuzýshynyń izin kesti.
Nemis ovcharkasy qymbat velosıped pen balalar arbasyn qoldy qylǵandardyń izine túsip, olardyń quryqtalýyna atsalysqan. Eki derek boıynsha da kúdiktiler ustalyp, jaýapqa tartylýda, dep málimdedi Almaty oblystyq ІІD baspasóz qyzmetindegiler.
Qazirgi tańda Almaty oblystyq kınologııa ortalyǵynda 23 qyzmettik ıt bolsa, taǵy 18 ıt aýdandyq jáne qalalyq bólimshelerde qyzmet kórsetýde. Olardyń kómegimen oblys aýmaǵynan 119 kg ártúrli esirtki zat tárkilengen.
