Relske basymen jatyp, poıyz astyna túsken semeılik aman qaldy
ASTANA. QazAqparat - Semeıde er adam poıyz relsine basyn qoıyp, óz-ózine qol salmaq bolǵan, dep habarlaıdy «QazAqparat» HAA tilshisi QTJ «Júk tasymaly» AQ baspasóz qyzmetine silteme jasap.
Oqıǵa 25 qazan kúni saǵat túski 14:10 shamasynda Semeı - Eski Ertis stansalary aralyǵynda bolǵan.
«Mashınıstiń aıtýynsha, zardap shekken adam aıaq astynan júgirip shyǵyp, relske basyn qoıa qoıǵan», - dep habarlady «Júk tasymaly» AQ-nyń baspasóz qyzmetinen.
Osyǵan qaramastan, er adam tiri qalǵan.
«Ol jedel járdem qyzmetimen Semeı qalasynda jetkizildi. Qazirgi ýaqytta onyń kim ekeni anyqtaldy. Zardap shekken adam mas kúıde bolǵan», - delingen habarlamada.
Kompanııadan málim etkendeı, osy kúni poıyz joldarynda taǵy bir oqıǵa tirkeldi. Kókshetaý-Novoıshımskaıa ýchaskesinde mashınıst temir jol boıynda bógde adamnyń júrgenin kórip, saǵatyna 75 shaqyrymmen kele jatqan poıyzdy jedel toqtatýǵa májbúr bolǵan. Aýa raıynyń jaısyzdyǵynan kórý múmkindigi az bolǵandyqtan, apattyń aldyn alý múmkin bolmady. Saldarynan qaýipsizdik erejelerin saqtamaı, temir joldyń ústimen qoı aıdap bara jatqan qoıshy zardap shekken. Atalǵan oqıǵanyń mán-jaıy anyqtalý ústinde.
«Júk tasymaly» AQ baspasóz qyzmetiniń habarlaýynsha, 2017 jyldyń 9 aıynyń ishinde Qazaqstanda poıyzdyń adam qaǵýyna qatysty - 83, malǵa qatysty 10-nan astam oqıǵa tirkeldi.
