Rektorǵa sálem aıtamyz — Mınıstrlik Shymkenttegi ýnıversıtetti teksermekshi
ASTANA. KAZINFORM — Tsıfrlyq damý, ınnovatsııalar jáne aeroǵarysh ónerkásibi mınıstrligi aqparattyq qaýipsizdik komıtetiniń tóraǵasy Rýslan Ábdiqalyqov Shymkent ýnıversıtetindegi stýdentterdiń jeke dereginiń urlanýy jóninde pikir bildirdi.
Ortalyq kommýnıkatsııalar qyzmetinde ótken baspasóz máslıhatynda komıtet basshysyna 2GIS, «ıAndeks Eda», Fonbet platformalarynan qazaqstandyqtardyń jeke derekteri qalaı qoldy bolǵany týraly suraq qoıyldy.
«Aqparatta aıtylǵan „Qazaqstandaǵy jetekshi bank“ 2021 jyly jabylyp qalǵan bank bolyp shyqty. Biz Qarjy naryǵyn retteý jáne damytý agenttigine habarlastyq. Olar da osy málimetti rastady. Ol bank qazir zańdy tulǵa retinde joq bolǵandyqtan uıymnyń derekteri urlanǵan-urlanbaǵanyn teksere almaımyz. Shymkenttegi ýnıversıtetterdiń birindegi stýdentterdiń jeke dereginiń urlanýyna kelsek, biz Memlekettik tehnıkalyq qyzmetten resmı shaǵym aldyq. Tekserý jumystaryn ázirlep jatyrmyz. ıAǵnı, ol ýnıversıtettiń rektoryna sálem aıta alamyz. Kútińizder, aqparattyq qaýipsizdik komıteti tekserý júrgizip, derekterdiń qandaı jolmen urlanǵan anyqtaıdy. Habarlama almasý materıaldarynan atalǵan JOO ákimshileriniń biri derekter ınfraqurylymynyń kiltin satqany kórinip tur», — dedi ol.
Komıtet atalǵan oqıǵanyń mán-jaıy áli zerttep jatqan kórinedi.
«ıAndeks eda» qosymshasyna kelsek, bir jyl burynǵy oqıǵany qaıta eske salǵan. Ókinishke qaraı, bir jyldyń ishinde bir de bir Qazaqstan azamaty dereginiń urlanǵanyn aıtyp shaǵymdanǵan joq. Qalǵan derekter boıynsha taldaý jasalyp jatyr. Ol forýmdaǵy derekterdiń kólemi óte úlken. Bizdiń mindet — sol urlanǵan derekterdiń ishinde jeke derekterdiń bar ekenin anyqtaý. Bul álemdik forým bolǵan. Onyń ishinde qazaqstandyqtar, ózge de azamattardyń deregi júr, senińizder. Sonyń ishinen naqty qazaqstandyqtardyń deregin tabý kerek. Sonyń negizinde derektiń qoldy bolýyna jol bergender jazalanady. Al deregi urlanǵan azamattardyń kim ekeni anyqtalsa, elektrondy úkimet arqyly árqaısysyna habar jiberemiz», — dedi Rýslan Ábdiqalyqov.
