Rektor taǵaıyndaıtyn kezde onyń buryn eshqandaı daý-damaıǵa ilikpegenine, abyroı-bedeline qaraımyz — Saıasat Nurbek
ASTANA. KAZINFORM — Otandyq JOO rektorlary bir laýazymda eki merzim ǵana jumys isteı alady. Bul týraly QR Ǵylym jáne joǵary bilim mınıstri Saıasat Nurbek aıtyp berdi.
«Sáýir aıynan bastap rektorlyqqa ótinim bergen úmitkerler eki merzim ǵana jumys isteı alatyndaı zańnamalyq ózgerister engizdik. Bir merzim úsh jyldan, eki merzim 6 jyl bolady. Odan keıin basqa oqý oryndaryna aýystyrylady», — dep túsindirdi S. Nurbek Ortalyq kommýnıkatsııalar qyzmetinde.
Sonymen birge, rektorlyqqa qoıylatyn talaptar da kúsheıtildi.
Endi bul qyzmetke rektorlyqqa akademııalyq salada keminde 10 jyl tájirıbesi bar, onyń ishinde 5 jyl basqarýshy laýazymda jumys istegen, ǵylymı dárejesi bar, aǵylshyn tilin biletin úmitkerler qabyldanady.
«Buryn áleýmettik jeli men BAQ-ta jaǵymsyz jaıttarǵa, moraldyq, repýtatsııalyq syn-qaterge ushyramaǵan adamdar úmitker bola alady», — dep tolyqtyrdy mınıstr.
Tilshiler buǵan deıin on jyl boıy bir laýazymda otyrǵan rektorlarǵa jańa zań qalaı áser etetinin surady.
«Jańadan engizilgen zań buryn qabyldanǵan sheshimderge áser ete almaıdy. Osy ózgeristerge deıin taǵaıyndalǵan rektorlar kelisimsharty aıaqtalǵan soń ǵana jańa talaptarmen jumysyn jalǵastyrady», — deıdi S. Nurbek.
