Rekordtyq kórsetkish: Nazarbaev Ýnıversıtetinde 1877 túlekke dıplom tabystaldy
ASTANA. KAZINFORM — Búgin elordada Nazarbaev Ýnıversıtetiniń kezekti túlekterine dıplom tabystaý rásimi ótti. Bıyl joǵary oqý ornyn bakalavrıat, magıstratýra jáne doktorantýra baǵdarlamalary boıynsha 1877 stýdent támamdady. Bul — ýnıversıtet tarıhyndaǵy rekordtyq kórsetkish.
Túlekter arasynda eń suranysqa ıe mamandyq — Computer Science (kompıýterlik ǵylymdar) baǵdarlamasy boldy. Osy baǵyt boıynsha 270 stýdent oqýyn aıaqtasa, onyń 237-si bakalavrıat túlekteri. Bul bakalavrıat boıynsha bitirýshilerdiń jalpy sanynyń 21 paıyzyn quraıdy.
Al eń kóp túlek Injenerııa jáne tsıfrlyq ǵylymdar mektebinen (673 adam) jáne Áleýmettik-gýmanıtarlyq ǵylymdar mektebinen (653 adam) shyqty.
Túlekterdiń biri Álisher Sabıǵalıev mehanıka jáne aeroǵarysh ınjenerııasy mamandyǵy boıynsha bakalavr dárejesin támamdady. Ol ýnıversıtette alǵan bilimin odan ári jetildirý maqsatynda magıstratýraǵa túsýge nıetti.
— Bul ýnıversıtet maǵan óte sapaly bilim berdi. Mundaǵy oqytýshylardyń qaısysyn alsańyz da, óz isiniń bilikti mamandary. Sonymen qatar osy oqý ornynda dostar taptym. Ortam óte parasatty, bilimdi jandar. Nazarbaev Ýnıversıteti maǵan túrli múmkindikter usyndy. Sonyń biri — stýdenttik jáne qoǵamdyq ómirge belsendi aralasý. Ýnıversıtette klýbtyq qyzmet jaqsy damyǵan. Biz ártúrli halyqaralyq baıqaýlar men jobalarǵa qatysyp, óz qabiletimizdi shyńdaýǵa múmkindik aldyq. Osy oqý ornynyń magıstratýrasyna da oqýǵa túsemin, — dedi Álisher Sabıǵalıev.
Dıplom tabystaý rásimine QR Parlamenti Senatynyń tóraǵasy Máýlen Áshimbaev qatysyp, túlekterge júrekjardy lebizin bildirip. Sondaı-aq úzdik stýdentterge dıplomdaryn jeke tabystady.
— Nazarbaev Ýnıversıteti elimizdegi joǵary bilimdi jańa deńgeıge kótergen jetekshi oqý orny boldy. Ol halyqaralyq standarttarǵa saı bilim berip, ǵylymı zertteý mádenıetin damytty. Ýnıversıtet qabyrǵasynda alǵan bilim — bolashaqqa jol ashatyn mańyzdy múmkindik. Sondyqtan bul tájirıbe ár túlektiń ómir boıǵy damýyna berik negiz bola alady, — dedi Máýlen Áshimbaev.
Al ýnıversıtet prezıdenti Vakar Ahmad túlekterge arnaǵan quttyqtaý sózinde oqý ornynyń basty mıssııasy sapaly bilim berý jáne básekege qabiletti mamandar daıarlaý ekenin atap ótti.
Aıta keteıik, Nazarbaev Ýnıversıteti Ortalyq Azııa men Kavkaz óńirindegi joǵary oqý oryndary arasynda 1-orynda tur.
Buǵan deıin, atalǵan oqý orny alǵash ret álemdik TOP-500 qataryna kirgenin de jazǵan edik.
