Rekordtyq aýktsıon: Ispanııa patshasynyń 1609 jylǵy altyn monetasy $3,5 mln-ǵa satyldy
ASTANA.KAZINFORM — 1609 jyly III Fılıpp patshanyń tapsyrysy boıynsha alǵash shyǵarylǵan 100 eskýdo nomınaldy ıspan altyn monetasy Jenevadaǵy Numismatica Genevensis SA aýktsıon úıinde 2,8 mln shveıtsarııalyq frankqa ($3,5 mln) satylyp, Eýropadaǵy aýktsıondarda satylǵan eń qymbat moneta atandy. Bul týraly TASS agenttigi aýktsıon úıiniń baspasóz qyzmetine silteme jasap habarlady.
Uıymnyń derekterine sensek, 339 gramm salmaqtaǵy bul moneta XVII ǵasyrda Ispanııa koronasy shyǵarǵan eń úlken altyn moneta bolyp tabylady. Moneta kúndelikti aınalymǵa arnalmaǵan, ol Ispanııa patshalyǵynyń baılyǵy men bıligin kórsetý maqsatynda jasalǵan.
Aýktsıon úıiniń málimeti boıynsha, moneta Segovııa qalasynda Amerıkany jaýlap alǵan ıspandyqtar ákelgen altynnan soǵylǵan. Monetada Kastılııa men Leon, Aragon, Portýgalııa, Avstrııa, Býrgýndııa, Brabant jáne sol kezde Gabsbýrgter baqylaýyndaǵy basqa da aımaqtardyń gerbteri beınelengen. III Fılıpptiń tapsyrysy boıynsha 1614–1620 jyldar aralyǵynda osy nomınaldy birneshe moneta taǵy soǵylǵan.
Eske sala keteıik, buǵan deıin «Tıtanıkte» qaza tapqan jolaýshynyń saǵaty aýktsıonda 2,3 mln dollarǵa satylǵanyn jazǵan edik.