Rekordtyq aptap pen qýańshylyq: Ulybrıtanııada myńdaǵan turǵyn aýyz sýsyz qaldy
ASTANA. KAZINFORM — Ulybrıtanııanyń ońtústik-shyǵysyn mekendegen myńdaǵan turǵyn rekordtyq ystyq pen kóktemgi qýańshylyq saldarynan aýyz sý tapshylyǵyna tap boldy. Bul týraly Reuters—ke silteme jasap, BELTA jazdy.
Agenttiktiń málimetinshe, sý berý júıesindegi irkilister 20 myńnan astam adamǵa áser etken. Olardyń ishinde jaǵalaýdaǵy Ýıtsteıbl qalasynyń shamamen 8 myń turǵyny bar. Halyqqa tótenshe jaǵdaıda jetkizilgen aýyz sýdy alý úshin uzyn-sonar kezekke turýǵa týra kelgen.
Qorshaǵan ortany qorǵaý agenttiginiń deregine sáıkes, aptap ystyq saldarynan sý tutyný kólemi kúrt artqan. Al naýryz jáne sáýir aılarynda jaýyn-shashynnyń az túsýi sý qoımalaryna qosymsha salmaq túsirgen.
Reuters málimetinshe, sońǵy jyldary Ulybrıtanııada jekemenshik sý kompanııalarynyń sý qubyry ınfraqurylymyna jetkilikti qarjy bólmeýine qatysty syn kúsheıip keledi. Sarapshylardyń pikirinshe, jelilerdi jańǵyrtýǵa ınvestıtsııanyń jetkiliksizdigi osyndaı jaǵdaılardyń jıileýine áser etip otyr.
Eske sala keteıik, buǵan deıin Eýropany aptap ystyq jaılaǵanyn jazǵan edik. Ulybrıtanııa 103 jyl burynǵy rekordty jańartqan bolatyn.
Aıta keteıik, Somalıda qýańshylyqtyń kúsheıýinen mıllıondaǵan adam qonys aýdarýǵa májbúr boldy.
