Rekord: Qazaqstan elektrolız zaýyty tórt mıllıon tonna «qanatty» metal shyǵardy

PAVLODAR. KAZINFORM - Bul rekordqa metallýrgter kásiporyn iske qosylyp, alǵashqy alıýmınıı shyǵarylǵannan beri 17 jyl 2 aı degende qol jetkizip otyr. 

Pavlodardaǵy Qazaqstan elektrolız zaýyty (QEZ) «qanatty» metall óndirisin bastaǵannan beri bastapqy alıýmınııdiń mereıli tórt mıllıondyq tonnasyn óndirdi.

- Tórt mıllıonynshy tonna ónimdi shyǵarý – kásipornymyzdyń jylnamasyndaǵy erekshe oqıǵa. Bul mereıli meje – bizdiń barlyq qyzmetkerimizdiń eńbegi, olardyń árqaısysy óndiriske óz úlesin qosyp júr. Bizdiń ujymnyń árbir múshesiniń arqasynda osy jyldar ishinde óndiris tabysty damyp, tıimdi bola tústi. Qazir kásiporynda óndiris dástúrlerin laıyqty jalǵastyryp, jańa jetistikterge qol jetkizip júrgen 2 myńnan astam qyzmetker jumys istep jatyr, - deıdi «Qazaqstan elektrolız zaýyty» AQ óndiris jónindegi dırektory Murat Jumabaev.

Metallýrgter úshin alǵashqyda tórt mıllıon tonna alıýmınııdi elestetýdiń ózi ǵajaıypqa teń edi. Eger 4 mıllıon paketti bir qatarǵa qoısańyz, Pavlodardan Máskeýge deıingi aralyqqa jol salýǵa bolar edi. Al eger mundaı kólemdi temirjolmen tasymaldar bolsa, onda 65 myń vagonnan turatyn quram qajet bolady.

Byltyr Qazaqstanda alıýmınıı eksporty 5 esege jýyq óskenin jazǵanbyz.