Rekord: fýtboldan ÁCh fınalynyń bıletteri 11 myń dollarǵa deıin qymbattady

ASTANA. KAZINFORM – Fýtboldan 2026 jylǵy álem chempıonatynyń fınaldyq matchynyń bıletteri tarıhtaǵy eń joǵary baǵaǵa jetti. FIFA belgilegen jańa qun boıynsha eń qymbat bılet 10 990 dollardy qurap otyr. Bul týraly BBC habarlady.

Mundaı baǵa buǵan deıingi álem chempıonattarynyń fınaldyq oıyndaryna satylǵan bıletter qunynan shamamen jeti ese joǵary. Osyǵan baılanysty jankúıerler arasynda qyzý talqylaý týyndap, áleýmettik jelilerde synı pikirler kóbeıgen.

2026 jylǵy álem chempıonatynyń fınalyna arnalǵan alǵashqy ashyq satylymda bılet quny 10 990 dollarǵa deıin jetip, fýtbol matchtary tarıhyndaǵy eń qymbat bılet retinde tirkeldi.

Buǵan deıin týrnırdi qabyldaýshy elder — AQSh, Kanada jáne Meksıka usynǵan bastapqy ótinimderde fınal bıletteriniń baǵasy 1550 dollardan aspaıdy dep kórsetilgen edi. Alaıda ótken jeltoqsanda resmı fan-klýb múshelerine bıletter 8680 dollarǵa deıingi baǵamen usynylsa, ashyq satylym bastalǵannan keıin baǵa odan ári ósken.

Salystyrý úshin, 2022 jyly Qatarda ótken álem chempıonatynyń fınalyndaǵy eń qymbat bılet quny 1604 dollar bolǵan. Osylaısha, 2026 jylǵy týrnırdegi baǵa buryn-sońdy bolmaǵan deńgeıge kóterildi.

Mamandar mundaı kúrt qymbattaýdy dınamıkalyq baǵa belgileý júıesimen túsindiredi. Bul tásil boıynsha FIFA suranys deńgeıine qaraı bılet baǵasyn ózgertip otyrady. Sondaı-aq fınaldyq matchqa qoljetimdi oryn sanynyń shekteýli bolýy da baǵanyń ósýine áser etken.

Ashyq satylym kezeńinde bılet baǵasy jeltoqsandaǵy alǵashqy toptamamen salystyrǵanda 38 paıyzǵa óskeni aıtylady. Atap aıtqanda:

• birinshi sanattaǵy bılet — 10 990 dollarǵa deıin;

• ekinshi sanattaǵy bılet — 7380 dollarǵa deıin;

• úshinshi sanattaǵy bılet — 5785 dollarǵa deıin.

FIFA satylymǵa shyǵarylǵan bıletterdiń tolyq tizimin jáne naqty sanyn jarııalamaǵandyqtan, jalpy satylym kólemin baǵalaý qıyn bolyp otyr.

Soǵan qaramastan, baqylaýshylar eń tanymal matchtarǵa, ásirese jetekshi quramalardyń oıyndary men pleı-off kezeńindegi basty kezdesýlerge suranys kúrt artqanyn aıtyp jatyr. Bul jaǵdaı jankúıerlerdiń narazylyǵyn týǵyzdy. Jeltoqsanda alǵashqy bıletter leginiń baǵasy keıbir sarapshylar tarapynan «jankúıerlerge jasalǵan orasan zor satqyndyq» dep baǵalanǵan. Degenmen FIFA quny 60 dollardan bastalatyn shekteýli kólemdegi qoljetimdi bıletter partııasyn da usynǵan.

Eske salsaq, fýtboldan 2026 jylǵy álem chempıonaty 11 maýsymda AQSh, Kanada jáne Meksıka elinde bastalady.

Sonymen qatar AQSh Іshki qaýipsizdik mınıstrliginiń basshylyǵy týrnır barysynda qaýipsizdikke baılanysty qaýip-qaterler bolýy múmkin ekenin eskertken.

Buǵan deıin FIFA prezıdenti Djannı Infantıno Iran quramasynyń 2026 jylǵy álem chempıonatyna qatysatynyn jáne jerebe qorytyndysyna sáıkes óz matchtaryn AQSh aýmaǵynda ótkizetinin málimdegen edi.