Rekord: Astanada bir mezette 25 kelinniń betashary ótti

ASTANA. KAZINFORM – Elordada bir mezette 25 kelinniń betashar rásimi ótti. Saltanat saraıynda ótken tarıhı oqıǵa KInES rekordtar kitabyna engizildi.

Bastapqyda sharaǵa 50 jup qatysýy kerek bolǵan. Alaıda resmı neke kýáligin alyp úlgergen 25 jup qana Saltanat saraıyndaǵy tarıhı oqıǵanyń keıipkerine aınaldy.

– 25 jup ta aldaǵy ýaqytta toı ótkizýdi josparlap otyrǵan bizdiń tutynýshylarymyz. Olarǵa habarlasyp, Qazaqstannyń KInES rekordtar kitabyna enetinderin, tarıhta qalatyndaryn aıtqannan keıin bári op-ońaı kelisti. Bul – barlyq áriptesterimizben birge uıymdastyrylǵan shara. Bárimiz KInES rekordtar kitabyna qalaı enýge bolatynyn aqyldasyp, osy sharany uıymdastyrýdy sheshtik, – deıdi Erkebulan Shaıqystan.

Al KInES rekordtar kitabynyń resmı ókili elimizde buǵan deıin mundaı baǵytta eshqandaı rekordtyq oqıǵa bolmaǵanyn aıtady.

– Búgin bizde jańa rekord tirkeldi. Elordadaǵy Saltanat saraıynda betashar uıymdastyrylyp, 25 juptyń nekesi qıyldy. Bizdiń rekordtar kitabymyzda buǵan deıin betasharǵa qatysty rekordtyq jaǵdaılar tirkelmegen, – deıdi Ákejan Shyńǵys.

Tarıhı sáttiń keıipkerine aınalǵan jas jubaılar bolsa, neke qııý sátinde erekshe tolqyǵandaryn aıtady.

– Qazir óte erekshe sezimde turmyz. Óıtkeni bul – qaıtalanbas kúnderdiń biri. Bul betashar jaqsy ótti degen oıdamyz. Mundaı usynys túsken kezde kelisý qıyndaý boldy. Sońynda oılana kele, ekeýmiz qatysatyn bolyp sheshtik. Al bizdiń saltanatty toıymyz tamyz aıynda ótedi, – deıdi Qýanysh Kádirbek pen Symbat Nurzilda.

Aıta keteıik, birer kún buryn júzýshi Ádilbek Mýsın Qazaqstan rekordyn jańartqan edi. 

Al qazaqstandyq áskerı qyzmetshi AQSh-ta ótken Best worrier baıqaýyna qatysyp 800 m qashyqtyqqa júgirýden rekord ornatty.