Reglament: Quryltaı otyrystary ótetin apta kúnderi bekitildi
ASTANA. KAZINFORM – Quryltaı otyrystary ashyq ótkiziledi jáne olardyń translıatsııasy bolady. Bul týraly búgin elordada Quryltaı Reglamentiniń jobasyn talqylaý barysynda depýtat Snejanna Imasheva málim etti.
-Quryltaı Reglamentiniń usynylyp otyrǵan jobasy – elimizdegi joǵary ókildi organnyń ishki uıymdastyrylýyn jáne qyzmet tártibin aıqyndaıtyn qujat. Reglamentte Quryltaı men onyń organdarynyń qyzmetin uıymdastyrý, otyrystardy, tyńdaýlar men Úkimet saǵattaryn ótkizý tártibi, zań shyǵarý protsesiniń qaǵıdalary, depýtattyq birlestikterdiń qyzmeti, sondaı-aq depýtattardyń óz ókilettikterin júzege asyrý tártibi aıqyndalady. Joba barlyǵy 31 taraýdan jáne 310 tarmaqtan turady, - dedi S. Imasheva Quryltaıdyń jalpy otyrysynda.
Osy oraıda ol Quryltaı jumysyn uıymdastyrýǵa qatysty túsinik berdi. Quryltaı qyzmetiniń negizgi nysany – onyń sessııalary. Kezekti sessııa jylyna bir ret – qyrkúıektiń birinshi jumys kúninen maýsymnyń sońǵy jumys kúnine deıin ótkiziledi.
Kezekti sessııalar arasyndaǵy kezeńde depýtattar zań shyǵarý bastamasy quqyǵyn iske asyrý, zańdarǵa túzetýler ázirleý, saılaýshylarmen jumys isteý sııaqty ókilettikterdi júzege asyrady. Óńirlerge shyǵý úshin depýtattarǵa kúntizbelik on kúnge deıin ýaqyt beriledi. Mundaı saparlar ár sessııada keminde eki ret júzege asyrylýǵa tıis.
- Quryltaı otyrystary, ádette, sársenbi jáne beısenbi kúnderi, tyńdaýlar – juma kúnderi, Úkimet saǵattary – dúısenbi kúnderi ótkiziledi. Otyrys depýtattardyń jalpy sanynyń keminde úshten ekisi, ıaǵnı keminde 97 depýtat qatysqan jaǵdaıda zańdy bolyp sanalady. Reglamentte otyrystardy shaqyrý jáne ótkizý, kún tártibin qalyptastyrý, depýtattardy tirkeý, jaryssózder ótkizý men daýys berý tártibi tolyq túrde aıqyndalady. Negizgi qaǵıdat – Quryltaı jumysynyń ashyqtyǵy. Otyrystar ashyq ótkiziledi jáne olardyń translıatsııasy kózdeledi. Sonymen qatar keıbir kózdelgen jaǵdaılarda qoljetimdiligi shekteýli aqparatty qorǵaý talaptary saqtala otyryp jabyq otyrystar ótkizilýi múmkin, - dedi depýtat.
Budan buryn habarlanǵandaı, Quryltaı aldaǵy 5 jyldaǵy jumysyn qalaı úılestiretini belgili bolatynyn jazǵan edik.
