«Regıon-GZ» memlekettik satyp alý tıimdiliginiń monıtorıngin júrgizýge múmkindik beredi
Bul týraly QazAqparat QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap habarlaıdy.
Eldiń negizgi satyp alý alańdarynyń derekterin biriktiretin «Satyp alýdyń biryńǵaı terezesi» aqparattyq-taldaý portalyn Agenttik qyzmetkerleri baǵany negizsiz kóterý táýekelderin aldyn ala anyqtaý úshin tabysty paıdalanady.
Kásipkerlerdiń quqyqtaryn qorǵaý jónindegi ýákil Rýstam Júrsinov: «Biz satyp alýlar josparyn jáne barlyq óńirler boıynsha satyp alýlardyń ózin taldaımyz, baǵalardy salystyramyz. Jobany iske asyrý bastalǵannan beri Sybaılas jemqorlyqqa qarsy qyzmetpen birlesip, shamamen 22,8 mlrd teńge somasyndaǵy bıýdjet qarajatynyń tıimsiz paıdalanylýyna jol berilmedi».
Spıker atap ótkendeı, bul júıe satyp alýdyń ashyqtyǵyn arttyrýǵa yqpal etedi, bul memleket basshysynyń 2020 jylǵy 1 qyrkúıektegi Qazaqstan halqyna Joldaýynda qoıylǵan negizgi mindetterdiń biri bolyp tabylady.
Júıe 2020 jyly pandemııa men tótenshe jaǵdaı rejımi kezinde óziniń tıimdiligin dáleldedi. Portal monıtorıng aıasynda Agenttiktiń memlekettik organdarmen usynymdaryn pysyqtaý nátıjesinde táýekeldi satyp alý sanynyń on ese qysqarǵanyn kórsetti.
«Ulttyq palatamen birlesken joba aıasynda memlekettik satyp alýlardyń baǵa komplaensiniń salasy bizdiń tarapymyzdan kúndelikti taldaýǵa jatady. Oń nátıje – únemdelgen qarajat qana emes, sonymen qatar adamdardyń taǵdyry, biz aldyn alý tásilimen quqyq buzýshylyq jasaýdyń jolyn kesemiz. Aldyn alý tek bizdiń qyzmetimiz ǵana emes, sonymen qatar barlyq memlekettik organdar men vedomstvolyq baǵynysty uıymdar da aınalysýy tıis», - dep atap ótti Agenttik Tóraǵasy Alık Shpekbaev.
«Regıon GZ» modýli «Satyp alýdyń biryńǵaı terezesi» portalynyń odan ári damýy bolyp tabylady. Usynylǵan júıede jınaqtalatyn esepter sybaılas jemqorlyq quqyq buzýshylyq táýekelderin anyqtaýǵa múmkindik beredi. Atap aıtqanda, taldaýshy satyp alý baǵasynyń kóterilgenin, básekege qabiletsizdiktiń joqtyǵyn, baǵanyń tómendeýin jáne basqa da birqatar kórsetkishterdi kórsetetin ındıkatorlardy kóre alady.
«SABT» satyp alý naryǵynyń ashyqtyǵyn arttyrýǵa baǵyttalǵan, bul kásipkerlerdiń basym bóligin biryńǵaı alańdaǵy tenderlerge qatysýǵa yntalandyrady. «Óz kezeginde bul ádil baǵa belgileýdiń, konkýrstyq usynystardyń sapasyn jaqsartýdyń jáne sybaılas jemqorlyq táýekelderin tómendetýdiń kepili», – dep atap ótti tanystyrylym barysynda Naryqty monıtorıngileý jáne saraptaý ortalyǵynyń basshysy Serikbek Elshibekov.
Spıker júıeniń árbir óńirge jáne jeke memlekettik organǵa keshendi túrde qaraýǵa múmkindik beretinine nazar aýdardy. Mundaı tásil qoldanystaǵy tájirıbeniń tutas kórinisin qalyptastyrady jáne reıtıng qurýǵa múmkindik beredi. Memlekettik organdar tarapynan portaldy qoldaný vedomstvolarǵa ózindik taldaý júrgizýge múmkindik beredi, mysalǵa, «bir kózden satyp alý» úlesiniń teris kórsetkishteri boıynsha, onyń negizinde naqty sharalar qurýǵa bolady.