«Regıon-10»: Qostanaı oblysynda eriktiler jasaǵy jeti jylda 473 adamdy aman alyp qaldy

ASTANA. KAZINFORM – Qostanaı oblysynda jeti jyldan beri jumys istep kele jatqan «Regıon-10» erikti izdestirý-qutqarý jasaǵy osy ýaqyt ishinde 621-den astam operatsııaǵa qatysyp, 473 adamdy aman tabýǵa kómektesti.

Qazaqstanda volonterlik qozǵalys
Foto: Kazinform

QR Mádenıet jáne aqpapat mınıstrligi baspasóz qyzmetiniń habarlaýynsha, búginde jasaq quramynda 18 jastan asqan 180-nen astam belsendi volonter men 30 jasóspirim bar. Olar táýlik boıy aqysyz kómek kórsetedi.

Eriktiler joǵalǵan adamdardy qala aýmaǵynda da, tabıǵat aıasynda da izdestiredi. Sonymen qatar jańa qatysýshylardy oqytyp, aldyn alý sharalaryn uıymdastyrady jáne tótenshe jaǵdaılar kezinde kómekke keledi.

«Regıon-10» polıtsııamen, Tótenshe jaǵdaılar departamentimen, jergilikti atqarýshy organdarmen jáne qoǵamdyq uıymdarmen birlesip jumys isteıdi. Jasaq músheleri órt pen sý tasqynynyń saldaryn joıýǵa, gýmanıtarlyq aktsııalarǵa, birlesken oqý-jattyǵýlarǵa jáne qaýipsizdik reıdterine qatysqan.

-Osy jyldar ishinde jasaqtyń qyzmet aıasy keńeıdi. Lısakovsk pen Rýdnyı qalalarynda onyń fılıaldary ashyldy. Al 2024 jyly jańa volonterlerdi daıarlaýǵa arnalǵan shtab jumysyn bastady,-delingen habarlamada.

Osyǵan deıin elimizde volonterlik tájirıbeniń eńbek ótiline eseptelýi múmkin ekeni týraly jazdyq.