Regbı: Qazaqstan áıelder quramasy halyqaralyq týrnırde jeńimpaz atandy
ASTANA. QazAqparat – Regbıden Qazaqstan əıelder quramasy Nıderland astanasynda ótken Amsterdam Sevens halyqaralyq týrnıriniń jeńimpazy atandy, dep habarlaıdy QazAqparat tilshisi.
El quramasy dəstúrli bəsekede 7 oıynnyń barlyǵynda jeńiske jetti. Bul qatarda Latvııa quramasy men Nıderlandtyń joǵarǵy dıvızıonyndaǵy klýbtar bar.
Aıta ketsek, el quramasy fınalda byltyr da atalǵan týrnırde jeńimpaz atandy. Al, 2019 jyly qazaqstandyq «Almaty» klýby týrnırdiń jeńimpaz tuǵyryna kóterildi.
Halyqaralyq týrnırdiń 50 jyldyq tarıhy bar. Jarys Eýropadaǵy bedeldi týrnırdiń biri sanalady. Týrnır alǵash ret 1972 jyly ótti.
Eske salsaq, budan buryn regbıden Qazaqstan quramasy Azııa chempıonatynyń kúmis júldegeri boldy.
