Regbı-7-den QR áıelder quramasy Azııa chempıonatyn jeńispen bastady
NUR-SULTAN. QazAqparat - Seýlde (Ońtústik Koreıa) Regbı-7 boıynsha Azııa serııasynyń I kezeńi bastaldy. Qazaqstannyń áıelder quramasy qurlyqtyq birinshiliktegi alǵashqy jeńisine qol jetkizdi, dep habarlaıdy QazAqparat Sports.kz saıtyna silteme jasap.
Qazaqstandyq regbıshi qyzdar taılandtyq qarsylastaryn 12:0 esebimen oısyrata jeńdi. Búgin elimiz sportshylary taǵy bir match ótkizedi. Bul joly olar Qytaıdyń oıynshylaryna qarsy oıyn kórsetedi.
Jerebe qorytyndysyna sáıkes, Qazaqstan komandasy regbı-7 boıynsha D tobyna túskenin atap ótý kerek. Qazaqstandyqtardyń qarsylastary – Taıland, Qytaı jáne Sıngapýr sportshylary. Ár toptyń alǵashqy eki komandasy (C jáne D, A jáne V lıterleri erler týrnıriniń toptaryna tıesili) 1-4 oryndar úshin pleı-offtyń jartylaı fınalyna shyǵady. Toptyq týrnırdiń úshinshi jáne tórtinshi oryndaryn alǵan komandalar pleı-aýtte 5-8 oryndar úshin talasady.
