Referendým: 10,3 myń daýys berý ýchaskesi qurylady

ASTANA. KAZINFORM – Referendým ýchaskeleriniń jalpy sany 10 327-ni qurady. Bul týraly elordada 6 qazandaǵa respýblıkalyq referendýmdy ótkizý máselesine arnalǵan otyrysta QR Ortalyq saılaý komıssııasy tóraǵasynyń orynbasary Konstantın Petrov aıtty.

Onyń aıtýynsha, referendýmǵa daıyndyq boıynsha jumysqa 35 kún ýaqyt bólinedi. Bul turǵyda saılaýshylar tizimin túgendeý bastalǵan jáne aldaǵy ýaqytta turǵyndar daýys beretin ýchaskeler boıynsha aqparat beriledi. 12 qyrkúıekke deıin azamattar referendým komıssııalary ornalasatyn oryndardan habardar bolady.

Sonymen qatar ol daýys berý 6 qazanda tańǵy 7:00-den bastap keshki 20:00-ge deıin jalǵasatynyn aıtty. Referendým qorytyndysy 7 kún ishinde jarııalanady.

«Referendým ýchaskeleriniń jalpy sany 10 327-ni qurady. Onyń ishinde 78-i Qazaqstan aýmaǵynan tys jerde, ıaǵnı álemniń 63 elinde», - dedi K. Petrov.

Onyń sózine qaraǵanda, 1 shildedegi jaǵdaı boıynsha el kóleminde 12 176 968 adam referendýmǵa qatysý múmkindigine ıe.

Óz kezeginde QR Ortalyq saılaý komıssııasynyń tóraǵasy Nurlan Ábdirov referendýmǵa qatysty tıisti qaýlylar qabyldanǵanyn aıtty.

Bul turǵyda, jergilikti atqarýshy organdar respýblıkalyq referendýmǵa qatysýǵa quqyǵy bar adamdardyń tizimin qalyptastyrýdy qamtamasyz etýi tıis. 

«Jergilikti atqarýshy organdar daýys berýdiń bastalýyna 20 kún qalǵanda, ıaǵnı 15 qyrkúıekte árbir ýchaske boıynsha respýblıkalyq referendýmǵa qatysýǵa quqy bar adamdardyń tizimderin belgilengen tártippen tıisti komıssııalarǵa akt boıynsha usynýdy qamtamasyz etýi kerek», - dedi OSK tóraǵasy.

Budan buryn habarlanǵandaı, Memleket basshysy Qasym-Jomart Toqaev «2024 jylǵy 6 qazanda respýblıkalyq referendým ótkizý týraly» Jarlyqqa qol qoıdy.