Reformalardy mindetti túrde sońyna deıin jetkizýimiz qajet - Toqaev
ASTANA. QazAqparat – Qazaqstan Respýblıkasynyń Prezıdenti Qasym-Jomart Toqaev ulyqtaý rásiminde bastalǵan reformalar mindetti túrde aıaǵyna deıin jetkiziletinin aıtty, dep habarlaıdy QazAqparat tilshisi.
«Bıyl halqymyz úshin aıryqsha mańyzdy jyl boldy. Qazaqstan damýdyń jańa dáýirine qadam basty. Biz túbegeıli betburysqa jol ashqan aýqymdy ózgerister jasadyq. Konstıtýtsııalyq reformany júzege asyrdyq. Memleketimizdiń eń basty salalaryn jan-jaqty jańǵyrttyq.
Sonyń arqasynda halyqtyń bolashaqqa degen úmiti artyp, senimi nyǵaıa tústi. Men aımaqtardy aralap, turǵyndarmen kezdeskende buǵan aıqyn kóz jetkizdim. Sondaı-aq, ótken referendým tyń bastamalardy jurtymyzdyń jappaı qoldaıtynyn kórsetti. Halyqtyń durys baǵyttaǵy ózgeriske umtylysy jumysqa zor serpin berdi», - dedi Prezıdent.
Sondaı-aq, elde bastalǵan reformalar sońyna deıin jetetinin atap ótti.
«Biz reformalardy sońyna deıin mindetti túrde jetkizýimiz qajet. Konstıtýtsııanyń jańa talabyna sáıkes, budan bylaı Prezıdent jeti jyldyq bir merzimge ǵana saılanady. Osylaısha, saıasatkerlerdiń jańa býyny bılik basyna kele bastaıdy. Men osy sheshimniń durys bolǵanyna kámil senemin», - dedi Memleket basshysy.
